28 майыште Марий Элым Вуйлатыше Ю.Зайцев Курыкмарий районыш миен коштын.
Заводышто
Козьмодемьянскысе «Потенциал» заводым уэмдаш эше 600 млн теҥгем колтат. Ты предприятий «Систэм Электрик» компаний тӱшкашке пура да электроэнергий ден автоматизаций шотышто Российысе ик эн кугу производительлан шотлалтеш.
– 2023 ийыште ме производствым вияҥдаш «Систэм Электрик» акционер обществе дене ойпидышым ыштенна. 2024 ийыште инвестицийын кугытшо 618 млн теҥгешке шуын.
Оборудованийым уэмдыме пашалан виктаралтше 30 утла проектым илышыш шыҥдарыме, производствым кугемдыме, социальный программым, тыгодымак СВО участник-влаклан полшышым ешарыме, – каласен Юрий Зайцев.
Саде ойпидыш почеш «Потенциал» заводышто у технологийлан да экологий шотышто йодмашлан келыштарен, оборудований паркым уэмдыме.
2023-2024 ийлаште 85 куштылго да неле производственный оборудованийым пашаш колтымо. Тыгак Козьмодемьянскыште илыше, заводышто пашам ыштыше, СВО участник да нунын ешыштлан полшымо.
– 600 млн теҥге дене оборудованийым уэмдена, производствыш цифровизаций ден автоматизацийым шыҥдарена, паша условийым саемдена, социальный программым шуктена. Тылеч шуко сатушто «Честный знак» маркировкым кучылташ йӧным ыштена, – ойлен «Систэм Электрик» компанийын гендиректоржо Алексей Кашаев.
Завод суткаште 700 тӱжем электроустановочный изделийым ыштен луктеш. Тыгак моло сатужат кумдан палыме: розетке, выключатель, монтажный ден распределительный коробко, шокшо кӱвар. Шукерте огыл SberDevices компаний дене «ушан» розеткым да выключательым лукташ палемденыт.
«Потенциал» ООО-што 1700 утла еҥ пашам ышта. Ты завод ончыкыжымат у сомылым ворандараш да у паша верым почаш шона. Кызыт компаний ден регионысо Правительстве коклаште у ойпидышым каҥашат.