1 ноябрь – Суд приставын кечыже.
Парыман еҥ-влак кажне ийын шукемыт. Алиментым веле огыл, еҥ-влак коммунальный услугымат огыт тӱлӧ, микрокредитым налыт да оксам пӧртылтен огыт керт. Налогым, штрафым тӱлыдымӧ еҥ-влакат пеш шукын улыт. Тыгай годым суд пристав-влак серышым колтат але варажым шкештат мӧҥгӧ мият. Суд пристав-влак судлаште лӱдыкшыдымылыкым, тыгак судын пунчалжым шуктымым тергат, должник-влакым, нунын погыштым кычалыт да закон почеш моло сомылым шуктат.
Суд пристав-влакын профессионал пайремышт вашеш Суд пристав-влакын Йошкар-Оласе 1-ше №-ан пӧлкаште пашам ыштыше элгӧргӧ службо лейтенант М.М.Петрова дене палдарена.
Прокурор лияш шонен
Марина Михайловна – «Алименты» категорий дене вӱдышӧ пристав-исполнитель, ты службышто 2015 ий годсек тырша.
Школышто тунеммыж годым ӱдыр прокурор лияш шонен. Садлан Йошкар-Оласе строительный техникумыш юридический факультетыш тунемаш пурен. Вара тиде направлений денак МарГУ-што бакалавриатыште шинчымашыжым келгемден.
– Тунеммем годым прокуратурышто практикым эртенам. Тушто пашаеҥ-влак паша верыштышт южгунам пелйӱд мартеат шинчат, чыла тергат, рашемдат. Мый тыге ом керт, очыни, манын шоненам, да тушто пашам ышташ шонымашем вашталтын. Университет деч вара УФСИН-ыш пашам йодын миенам, но опытем укелан кӧра налын огытыл. Вара Суд пристав-влак федеральный службыш документем пуэнам. Кеҥеж каникул деч вара 2015 ийыште тиде службыш толынам да але марте тыштак тыршем. Пашам ыштымем годымак МарГУ-што магистратурым тунем лектынам, – каласкала М.Петрова.
Паша шуко
Икымше паша кече деч ончыч моткоч тургыжланен. Но М.Петрова ФССП-ште стажировкым эртен, тунеммыж годым практикышкат тышкак коштын, садлан куштылгыракын чучын. Ик ият пеле наре службо дек тунемын, а ынде вес вере пашам ыштен огешат мошто гай чучеш тудлан.
Марина Михайловна эрдене пашаш толеш, у материалым шергалеш, парыман еҥ-влак дене вашлийын кутыра, нунын деч умылтарымашым налеш. Правам пудыртымо случай уло гын, административно мут кучаш шогалтат, тылеч вара закон кӱштымым шуктымо огыл гын, уголовный пашам тарваташ материалым погат. Кастене участкылаш лектыт, парыман еҥ-влаклан оксам тӱлаш кӱлмӧ нерген ойлат. Нуным чын корныш шогалаш мут дене кумылаҥдат, шке икшывыштлан полшаш ойлат. Шомак дене умылтарен сеҥаш ок лий гын, виеш ыштыктыме йӧн-влакым кучылташ логалеш.
– Еш гыч кайыше ава але ача веле огыл, икшывым ончаш права деч посна кодымо ача-ава-влакат шке икшывыштлан алиментым тӱлышаш улыт. Кандашымше ий пашам ыштыме жапыште службышто тӱрлыжат лийын. Южыжо кужу жаплан ушышто кодеш. Южгунам ӱдырамаш дек мӧҥгыжӧ миет, тушто лавыран, ӱпша, кочкаш нимат уке. Ача
еш гыч каен, но тудат алиментым ок тӱлӧ. А изи икшыве шинчашкет онча да, пуйто «Мый тыште илен ом керт» манын, мут деч посна ойла. Ме, суд пристав-влак, ӱдырамашлан умылтараш тыршена. Но арака шке пашажым ышта. Лач кочывӱдлан кӧра ятыр еҥ алиментым ок тӱлӧ. Але пӧръеҥ еш гыч кая, ӱдырамаш шке ойгыжым кочывӱд дене луштара. Икшыве-влак уда условийыште кушкыт. Варажым ӱдырамаш деч икшывыжымат поген налыт, – манеш Марина Михайловна.
Службышто пеҥгыде лийман
Парымым тӱлыдымӧ еҥлан эн ончыч оксам тӱлаш кӱлмӧ нерген увертарымашым колтат. Палемдыме жапыште оксам тӱлымӧ огыл гын, тудын счётысо оксам арестоватлат, пашадарым кучен кодат. Парым лу тӱжем теҥге деч шуко гын, тыгай еҥлан Россий гыч вес элыш каяш ок лий. Алиментым тӱлыдымӧ еҥлан водительский права дене пайдаланаш чарат. Тидат парымым тӱлаш ок тарате гын, суд пристав-влак илыме верышкышт мият, умылтарымашым возыктат. Айдеме тылеч варат парымжым ок тӱлӧ гын, тудын погыжым, автомашинажым арестоватлат.
– Кастене паша вер гыч лектам да кече мучко тушто мо ышталтме нерген мондем. Службыш толмем почеш тӱрлӧ ача-ава, икшыве нерген шонкален коштам, нуным чаманем ыле. А кызыт тидын шотышто пеҥгыдырак лияш тунемынам. Кажне айдеме шке илышыжлан мутым куча. Ӱдырамаш икшывым ыштен гын, тудым ончышаш. Илышыште тӱрлӧ ситуаций лиеш, пӧръеҥ еш гыч кая гынат, икшыве-влаклан кӧра виянрак лийман огыл мо?
Шкем шке араленат моштыман. Южгунам парыман еҥын илыме верышкыже миет, а тудо тый дечет ала-мыняр пачаш виянрак. Тыгай годым ваштарешыже пӧръеҥ суд пристав шога гын, йӧнанрак. Но мый шкемым начарлан ом шотло, шкемым арален сеҥем, – манеш М.Петрова.
Ава, пелаш
Пашаште тудо пеҥгыде гын, мӧҥгыштыжӧ кок икшывыжлан – ныжыл ава, пелашыжлан – йӧратыме еҥ. Яра жапшым ӱдырамаш ешыж дене эртараш тырша. Каныш кечын тутло кочкышым пырля ямдылат, самокат дене коштыт.
М.Петрова 2011 ий годсек машина дене кудалыштеш. Шукерте огыл тудо «Автоледи-2022» конкурсыш ушнен.
Суд пристав-влакым шушаш профессионал пайремышт дене уло кумылын саламлена! Пашада лӱдыкшыдымӧ да лектышан лийже!