Апрель мучаште юалгырак игечым чытыше кушкыл-влакым ӱдаш лиеш: редисым, кочушменым, кешырым, петрушкым, сельдерейым, пастернакым, ревым, салатым, шпинатым, укропым да кинзам. Нӧшмӧ вашкерак шытен лекше манын, йыраҥым изоспан дене леведаш темлат.
Шоган, шинчаланшудо да шукияш моло йыраҥым тошто лышташла деч эрыктыман, пушкыдемдыман. Тыге рок вашкерак ыра да кушкыл-влак писынрак кушкын каят.
Сад-пакчаште рок ырен шуын гын (10-12 см келгытыште 10 градус марте леве лийшаш), гладиолусым, георгиным шындаш лиеш. Юалге да утыждене вӱдыжгӧ рокышто гладиолус шоган ок шыте, шӱяшат тӱҥалын кертеш.
Апрель мучаште росоталанат утларак тӱткышым ойырыман. Кызыт тушко вӱдым ситышын шавыман да атысе рокым пушкыдемдыман. Кушкылым йыраҥыш кусарен шындаш жап шуэш, садлан росотам юалгырак южлан эркын туныктыман: балконыш але верандыш лукман. Игече келшен толеш гын, йӱдланат туштак кодаш лиеш. Но шарныза: помидор росотам тура кечыйол йымак иканаште вераҥдыман огыл.
Авторын фотожо.