Салам лийже, «Кугарня» газет редакций. Мый шке илышем гыч ик историй дене палдарынем. Тиде ятыр ий ончыч лийын гынат, жапын-жапын тудын нерген шарналтем.
Такшым гын ны вес тӱнясе илышлан, ны экстрасенс але локтен моштышо еҥ-влакын улмыштланат ом ӱшане. Самырыкем годым авамын йолташ ватыже икана, кидкопамым ончен, шуко илет, ӱдырым ондакак налат, кум гана ешым чумырет, кум эргыч лиеш манын мужедын ыле. Тидын нерген мый монденамат.
Университетыште кокымшо курсышто тунеммем годым Катям марлан налынам, ик ий гыч эргына шочын. Лач тунам саде ӱдырамашын ойлымыжым шарналтенам, шуко илаш тӱҥалат манмыже поснак ушеш кодын. Тылеч вара шке илышем нерген тургыжланен омыл – тӱрлӧ чер, лӱдыкшӧ деч шекланымым чарненам, корныштат утыждене писын кудалыштынам. Саде ӱдырамашын ойжылан пуйто ӱшаненамак.
Катя дене пырля кужун ышна иле, ойырлышна. Тудлан чапле автомашинам коденам да шкаланем тоштырак иномаркым налынам. Тошто – тоштак. Икте шалана, весым тӧрлыман. Но мый транспортем олмыкташ вашкен омыл.
Икана паша дене вес олаш, 300 наре меҥге тораш, кудалаш кӱлын. Игече йӱран ыле. Ныл шагатлан кынелын, корныш тарваненам. Кечыгут мо кӱлешым ыштенам да кастене мӧҥгӧ толаш лектынам. Каслан йӱр эшеат талышнен ыле. Но мыланем тиде чаракым ыштен огыл – газ педальым сайынрак тошкалын чыменам, икте почеш вес машинам эртен кудалынам. Пелйӱд лишан мӧҥгӧ толын шуынам да, кочдеак, койкыш шуҥгалтынам.
Эрлашыжым эрдене автосервисыш каяш кӱлын. Тушко изиш миен шуын омыл, лакыште тӧршталтыме дене машина капот почылтын, ончыл янда пудырген. Йӧра эше талын кудалын омыл. Машина гыч лектынамат, шонен шогем: «Теҥгече корнышто писын кудалмем годым капот почылт кая ыле гын? Тидын годым иктаж кугу машинаш миен керылтам ыле гын?..»
Тунам машинамым кӱлынак ачалыктенам. Тылеч вара кӧргыштем ала-мо вашталтын: мужедме – мужедме дене, илышнам шке огына арале гын, нимогай юзо вий мыланна ок полшо. Садлан тиде случай деч вара тазалык, лӱдыкшыдымылык шотышто пеш тӱткӧ лийынам, машинам шотышто кучем.
Пӱрымашланат ӱшанаш тӱҥалынам. Шукерте огыл кумшо гана ешым чумыренам. Икшыван лияш шонена. Кумшо ганат эрге шочеш гын (ончычсо кок пелашем деч кок эргым уло), авамын йолташ ватыжын мужедмыже чын лиеш.
Владимир.
Йошкар-Ола.
Интернет гыч налме фото.