Ынде пелйӱдым вучыман огыл

Госуслуги порталыште врач-влак дек приёмыш возалташ лийме жапым 27 январь гыч вашталтеныт, палдара Марий Элысе Тазалык аралтыш министерстве.

Ынде республикысе медорганизаций-влак приёмлан записьым 17 шагатлан вераҥдаш тӱҥалыт (тылеч ончыч пелйӱд деч вара гына возалташ лийын), 14 кече ончыч возалташ йӧн уло. 14 тӱрлӧ специалист дек логалаш талоным налаш лиеш.

Госуслуги порталыште эше ик услуго темлалтеш – узкий специалист дене тергалтше черлыеҥ вес приёмыш толаш направленийым ты врач дечак налын кертеш. Варажым тудо ты направлений номер дене, Госуслуги порталыш пурен, саде специалист дек приёмыш возалтеш.