Марий Элым Вуйлатыше Ю.Зайцев ден республикысе транспорт министр А.Герасименко 2023 ийым иктешленыт да тенийлан паша планым рашемденыт.
Марий Элыште корно отрасльым вияҥдыме шотышто ик эн тӱҥ направлений – «Лӱдыкшыдымӧ сай качестван корно» нацпроект. А.Герасименкон каласкалымыж почеш, 2023 ийыште кундемыштына «Регионысо да верысе корно сеть» проект почеш 402 меҥге кужыт автомобильный корным шотыш кондымо, тиде палемдыме график деч 112 меҥгылан шукырак.
2023 ийыште тылеч ончычсо идалык дене таҥастарымаште автокорнышто ДТП-ште колышо-влак шагалеммым шотыш налаш гын, Российысе моло субъект кокла гыч Марий Эл – кокымшо верыште.
Ӱмаште Ю.Зайцевын темлымыж почеш 90 автобусым налме. Тыгак инфраструктурный бюджетный кредит кӱшеш вич троллейбусым налаш кугыжаныш контрактым ыштыме, регионым 2030 ий марте вияҥдыме шотышто у индивидуальный программым илышыш шыҥдарыме почеш 50 троллейбусым налаш темлымашым ямдылыме.
2023 ийыште Йошкар-Оласе микрорайонлаш калыкым шупшыктышо транспорт икмыняр у маршрут почеш кудалышташ тӱҥалын. «Умный транспорт», «Транспорт Йошкар-Ола» приложений-влак, «maps12.ru» республикысе транспортный портал да «Яндекс транспорт» ден «2gis» платформо-шамыч полшымо дене еҥ-влак калыкым шупшыктышо транспортын пашаж нерген онлайн режимыште пален налын кертыт.
Транспорт да корно озанлык министрын палемдымыж почеш, тачысе кечылан 2024 ийыште «Лӱдыкшыдымӧ сай качестван корно» нацпроект почеш ыштышаш паша шотышто кӱлеш чыла контрактым ыштыме. Ты нацпроект почеш тений 44,74 процент автокорным нормативный требованийлан келшышын шотыш кондаш палемдыме. Тыге республикысе 24 объектыште 170 меҥге наре кужытан корным ачалышаш улыт.
Интернет гыч налме фото.