29 февральыште Россий Президент В.Путин Федеральный Собранийлан посланийжым ойлен.
Тушто Путин ятыр темым авалтен. Эн ончычак внешний политике да спецопераций нерген мутым луктын. Тудын мутшо почеш, Россий кеч-могай ӱжмашланат ямде улмыжым ончыктен, СВО-лан полшаш элысе бизнес миллиард дене оксам колтен, элгӧргӧ пашашке шӱшкылташ иктыланат она пу. Сарым пытараш, нацизмым куклаш да спецоперацийын чыла задачыжым шукташ Россий чыла ышташ ямде манын. Элнан стратегический ядерный вийжат тӱрыснек ямде. А Россий космосыш ядерный оружийым колтен манын ойлыштымыжо США-лан кӱлеш. Мом Касвел шонен луктеда, ядерный оружий дене кучедалмаш марте шуктен кертеш, но тудын мучашыже кызыт интервент-влаклан ойган лиеш. Элна Евразийын икгай лӱдыкшыдымылыкшӧ шотышто у контурым ыштыме шотышто диалоглан ямде.
Социальный сферым авалтымыж годым В.Путин тӱрлӧ проект нерген ойлен. «Еш», «Шуко илыме да чолга илыш» у нацпроект-влак лийыт манын. 2024 ийыште «Российын молодёжьшо» проект почеш пашам тӱҥалаш кӱштен. 2030 ий марте ава капиталым, льготан еш ипотекым шуяш ойлен. Шагал аза шочмо регион-влаклан лишыл ийлаште 75 млрд наре теҥгем колташ палемден. Тыгак В.Путин кокымшо йочалан налог вычетым кок пачаш кугемдаш каласен. А МРОТ 2030 ийлан 35 тӱжем марте кушкеш манын.
А 2025 ий гыч йочасад-влакым капитально олмыкташ тӱҥалыт. Вет шуко зданийжым совет жапыштак чоҥымо манын. Школ ден йочавсадлам олмыкташ 400 млрд утла теҥге ойыралтеш. 1 март гыч класс вуйлатыше ден техникумлаште группым вуйлатыше-влакын федеральный выплатыштым 10 тӱжем марте кугемдаш палемдыш. А школ ден колледжлаште директорын воспитаний шотышто советникшылан ешартыш 5 тӱжем теҥгеаш премийым ыштат.
Тӱрлӧ регионысо бюджетник-влакын пашадарыштым 2025 ий марте кабминлан ончен лекташ да икгайым ышташ, а 2026 ийыште уло эллан ты пунчалым лукташ кӱштен.
«Кадр-влак» у проект лийшаш. Техникум ден колледж-влакым уэмдыме программым ыштат. Тидлан куд ийлан 120 млрд теҥгем ойырат. Тыгак 124 млрд теҥгем 800 вузысо тӱшкагудым олмыкташ палемдыме. 2030 ий марте 25 университет кампусым ыштышаш улыт. А чылаже 40 студенческий городок лийшаш. Ты сомыллан 400 млрд теҥгем ойырат.
Экономикым, промышленностьым да технологийым вияҥдыме йодышламат авалтыме. Российыште ВВП импортым 19 гыч 17 процент марте иземдаш, 50 инженерный школым чоҥаш палемдыме. Ятыр сатум, эмым, транспортым элна шке ыштен лукшаш. А 2030 ийыште промышленный робот шотышто 25 лидер эл радамышке пураш палемден. 100 деч шагал огыл технопаркым ыштыман. «Экономика данных» у нацпроект лиеш. Почеш кодшо регион-влакланат полшаш да ятыр моло сомылымат ворандараш кӱштен Президентна В.Путин.
Эльвира Терентьева.