Кугу Отечественный сарыште сеҥымылан 78 ий темме вашеш 1 — 5 майыште марте Москваште «Москва. Май. Победа» IX военно-патриотический слёт лийын. Марий Элын чапшым тушто Медведево посёлкысо 3-шо номеран школын 5-ше «А» ден 6-шо «А» класслаште тунемше 30 кадет гыч чумыргышо «Орлята» команде арален.
Слётышто элнан тӱрлӧ регионжо гыч 12 команде ушнен. Кадет-влак уш-акылым пудыратыше, мастарлык, спорт мероприятийлаште вийыштым тергеныт. Тылеч посна нуным Москва дене палдареныт. Тоштерыште, паркыште, ВДНХ-се «Космос» павильонышто, Йошкар площадьыште лийыныт. Тыгак Москосо зоопаркыште, Ю.Никулин лӱмеш циркыште, Цветной бульварыште каненыт.
Слётын икымше кечынже участник-влаклан школын йӱлаже да тусо кадет-влакын пашашт дене палдарыман ыле. Тидын нерген 5-ше «А» классын кадетше Е.Купсольцев ден 6-шо «А» классын кадетше Е.Черепанова каласкаленыт. «Представление команды» номинацийыште нуным икымше вер дене палемденыт. Строй дене ошкедыме да мурымо конкурс ик эн кӱкшын аклалтын. Кадет-влак тидлан чотак ямдылалтыныт. Тушто командым сайын шуктен моштымым, кадет-влакын тӱжвал сыныштым, командирын командым пуэн моштымыжым онченыт. Ты номинацийыште командын чыла участникше-влак участвоватленыт. Тыге «Строевая подготовка» номинацийыште «Орлята» команде эн тале лийын.
Спорт мероприятийлаште вич тӱрлӧ йыжыҥыште писылыкым да чолгалыкым ончыктыман ыле. «Орлята» команде «Эстафета», «Отжимание» йыжыҥлаште икымше, «Челночный бег» йыжыҥыште кокымшо верлам налын. Личный зачётышто тыгак ятыр призовой верым налыныт.
«Историческая викторина» номинацийыште организатор-влак Кугу Отечественный сар нерген йодышым ямдыленыт. Тушто команде кокымшо вер дене палемдалтын.
Медведево посёлкысо 3-шо номеран школын кадетше-влак кундемнан чапшым кӱкшын ончыктеныт. Моткоч кугу тау тунемше ден туныктышо-влаклан!