5 августышто Марий Элым Вуйлатыше Юрий Зайцев Советский район администраций вуйлатышын пашажым жаплан шуктышо Евгений Пушкин дене вашлийын мутланен. Ты должностьышто тудо июнь кыдал годсек тырша.
Вашлиймаш годым Советский районым социально-экономически вияҥдыме да тӱрлӧ проектым шуктымо шотышто каҥашеныт.
Районышто нацпроект, федеральный ден республиканский программе-влак илышыш шыҥдаралтыт. Теве «Безопасные качественные дороги» нацпроект почеш 17,9 км корным нормылан келыштарат, тидыже 414,1 млн теҥгеш шуэш. «Жильё и городская среда» нацпроект почеш 4 общественный верым да 5 кудывечым шотыш кондат, пашан акше – 11,2 млн теҥге. «Беспилотные авиационные системы» нацпроект дене келшышын, Роҥго кыдалаш школышто Пилотдымо авиационный системе шотышто практический ямдылалтмаш рӱдерым почмо.
Тылеч посна Советский районышто верысе инициативе программе почеш 11 проект паша шукталтеш. Тидлан 13,6 млн теҥге ойыралтын.
Лишыл кок тылзыште Марий Элысе Транспорт да корно озанлык министерствын целевой субсидийже дене шуко пачашан пӧртла деке намийыше корным да кудывечым олмыктат. Тидыже 6 млн теҥгешке шуэш.
Тыгак Евгений Пушкин 2024 ийыште тӱвыра да тунемме организацийлаште ышталтшаш ачалкалыме паша нерген каласкален.
Эльвира Терентьева.
Марий Элым Вуйлатышын пресс-службыжын фотожо.