14 октябрьыште Озаҥ олаште дзюдо дене «Бурые медведи» турнир эртаралтын. Тушко Чуваший, Татарстан, Марий Эл республила, Самара, Тольятти, Ульяновск олала, Пермь край гыч спортсмен-влак ушненыт.
Турнир Татарстан Республикыште дзюдо спортым шарыме, спортын ты видыштыже мастарлыкым шуарыме, тӱрлӧ кундемысе спортсмен-влак дене кылым пеҥгыдемдыме, таза илыш-йӱлам кучаш кумылаҥдыме шонымаш дене эртен.
Марий Элын чапшым Медведево посёлкысо «Витязь» спортклубын спортсменже-влак араленыт. Тренерышт – А.В.Сергеев. 38 килограмм нелытан-влак коклаште М.Годунов кокымшо верым налын, 32 килограмм нелытан-влак коклаште Е.Волков кокымшо, Р.Лисицын кумшо, 26 килограммыште М.Сусликов кумшо лийыныт.