26 ноябрьыште Марий Элым Вуйлатыше Ю.Зайцев республикыште илыше-влакын йодышыштлан ик шагатат пеле жапыште вияш эфирыште вашештен.
Йодыш ятыр сферым авалтен. Спецопераций йодышым тарватыме годым Ю.Зайцев тений Марий Эл 14 гуманитарный грузым колтен да ты пашашке кундемыштына илыше кажне еҥ ушнышаш, вет сарзыеҥ-влак мемнан верч элнам аралат манын.
Транспорт да корно йодышламат кугун каҥашыме. Вуйлатыше палемден: 2024 ийыште лач ты теме дене еҥ-влак 2500 утла йодыш дене лектыныт. «Транспортым уэмдыман. Тений кундемышкына 10 у троллейбус ден 90 автобусым налме. Кызытат 5 троллейбусым налме шотышто тӱрлӧ сомыл ышталтеш. «Транспорт России» форумышто троллейбусым ыштен лукшо предприятий дене ойпидышым ыштенна. Тудын почеш 80 утла у троллейбусым налаш шонена», – ойлен Юрий Викторович.
Рӱдолаште Йыван Кырля ден Строитель-влак уремлам ушнымаште корным ик эн неле участке манын палемденыт. Тушто ачалыме пашам 2024-2028 ийлаште шукташ палемдыме. Еҥ-влак Курыкмарий район Тӹрӹнь Йӓктерлä (Пикузино) ялыш корным ышташ йодыныт, вет тушто асфальтым 40 ий ондак пыштыме.
– Республикыште улшо 1500 утла населённый пункт гыч 640 вереже корно уке. Тений Курыкмарий районышто кум корным олмыктымо. Корным чоҥымо дене республикна ончылно кая. Туге гынат еҥ-влак садак тургыжланат. «Сай качестван лӱдыкшыдымӧ корно» нацпроект деч посна «Комплексное развитие сельских территорий» проект уло. Тудлан Российысе ялозанлык министерстве вуйын шога. Ты программышкат ушнаш лиеш. Кызыт Курыкмарий район администрацийыште палемдыме почеш, саде ялыш корным ышташ 400 бетон плитам налме, бетонный корно лиеш, – вашештен регионым Вуйлатыше.
Йошкар-Оласе 9-ше микрорайонышто илыше-влак Ю.В.Зайцев деке образований йодыш дене лектыныт, тушто у школын кӱлешлыкше нерген ойленыт.
Марий Элым Вуйлатышын мутшо почеш, тушто 1100 еҥлан келыштарыме школым 2025-2027 ийлаште чоҥаш палемдыме. «Синяя птица» школым варашрак, но чоҥен шуктат, манын. 25 школым олмыкташ палемдыме. А 2027 ий марте 40 школым ачалышаш улыт. Фестивальный уремыште 80 веран йочасад лийшаш.
Тыгак рӱдолаште кнопкан светофор-влакым вераҥдыме, лумым эрыктыме йодыш-влаклан вашешташ вияш эфирыш Йошкар-Ола мэрын пашажым жаплан шуктышо А.Трудиновым ӱжын.
– Телылан ямде улына. Коммунальный озанлыкысе паша-влакым шуктышо 91 технике 100 процентлан ямде. Иян корнылашке шаваш 15 тӱжем тонн ошма да шинчал йӧре ыштыме вартышым ямдылыме. Тений лумым кораҥдаш у куд спецтехникым налме. Тыгак ӱмаште шуко луман теле лиймым шотыш налын, икмыняр управляющий компаний дене олам эрыктыме шотышто ешартыш 20 техникым лукташ ойпидышым ыштыме, – каласен Антон Аркадьевич.
Тыгак медицине йодышым тарватыме. Врач деке возалтме йӧн да специалист-влаклан полыш лийме нерген ойлымо.
Туризм йодышат ӧрдыжеш кодын огыл. Тидын нерген вияш эфирышке шке ойжо дене Юрино район администрацийым вуйлатыше Марина Шихова ушнен. Тудо Юрино посёлкышто вашке у причал лиеш манын. Туризмын кӱлешлыкше нерген умылтараш йодшо еҥлан Ю.Зайцев ден М.Шихова тиде регионысо экономикылан парышым кондышо индустрий манын пеҥгыдемденыт.
Мучаште личный йодыш-влак ыльыч. Туддеч соцкылысе личный каналже-влакым идентифицироватлаш Роскомнадзорыш йодмашым пуэнда мо манын йодыныт. «Нуным пеҥгыдемдыме шотышто увер 10 кече жапыште толеш. Чыла вере шот-радам лийшаш. Интернет кумдыкыштат. Вет тушто аферист, экстремист-шамычлан вер уке», – вашештен Марий Элым Вуйлатыше.
Тыгак Ю.Зайцевлан блиц-йодыштмашым эртареныт, шочмо кечыже вашеш шкаланже тыланымашым ойлыктеныт, Шочмо элым йӧратымашым умылымашыж нерген йодыныт.
Эльвира Терентьева.