Икшыве – ешым сӧрастара, ямым пурта, вате-марий кокласе кылым пеҥгыдемда. Теве Волжский район Ӱлыл Азъялыште илыше Ярутовмытын суртыштышт моткоч весела, йомартле. Йоча юарлыме йӱк эре солна. Зинаида Петровна ден Николай Викторович 15 икшывылан ача-авам алмаштеныт, ешым пӧлекленыт.
Вате-марий коктынат Волжский кундемын шочшыжо улыт. Зинаида Петровна Нурмучаш Шайра ял гыч, Николай Викторович Ӱлыл Азъялеш шочын-кушкын. Волжск оласе кок тӱрлӧ заводышто тыршымышт годым икте-весе дене палыме лийыныт, келшаш тӱҥалыныт. 1975 ийыште ешаҥыныт да марийжын шочмо суртышкыжо, Ӱлыл Азъялышке илаш кусненыт. Эн ончыч пу, варажым кермыч пӧртым чоҥеныт.
Вате-марийын паша корнышт ялысе совхозышто шуйнен. З.Ярутова шуко ий кочмыверым вуйлатен, Николай механик лийын. Пашаче вате-марий вольыкым шуко ашненыт. Сулен налме канышыште улыт гынат, тачат нуно ты пашам куанен шуктат. Вӱташтышт кок ушкал, кум сӧсна, икмыняр шорык шогат, чывым, комбым, лудым кучат.
– Пакчана кугу, кандаш гектар мландым налынна. Тушто шудым, кавуным да моло пакчасаскам куштена. Пареҥгымат шуко шындена, тудо вольыклан кӱлеш. Шӧрым шкан ситарена, еҥ-влакланат ужалена. Волжск олашке шӧрым, торыкым, ӱйым ужалаш шупшыктена, – мане З.Ярутова.
Зинаида Петровна ден Николай Викторович ик ӱдырым да кок эргым ончен куштеныт, илыш корнышко луктыныт. Кызыт коча-ковам куд уныка куандара. Наташа пошкудо Вакутсола ялыште ешыж дене ила, ныл шочшан ава. Женя эргышт Пӧтъялыште пожарниклан тырша, Ӱлыл Азъялыште ешым чумырен, кум шочшан ача. Эн изирак Сергей эргышт ача-ава пелен ила. Ярутовмытын Дима уныкашт кызыт Украиныште мландышке кучедалеш.
Катя, Аня, Вова, Ирина, Таня…
Ача-ава деч посна неле. Зинаида Петровна тидым сайын умыла: 12 ияш улмыж годым тулыкеш кодын. Сандене ача-ава деч посна кушшо икшывым чамана, кумылжым налын мошта. 2007 ийыште вате-марий тулык да ача-ава деч посна кодшо йоча-влакын Волжск оласе рӱдерышт гыч ик ешыште шочын-кушшо 13 ияш Катям, 11 ияш Аням, 14 ияш Вовам ончаш налыныт.