Сентябрь мучаште Марий Элыште бадминтон дене «Онарын мландыштыже» республикысе чемпионат эртен. Тушто кок шӧртньӧ да ик ший медаль дене Наталья Шишкина палемдалтын.
25 ий модеш
Наталья Шишкина Йошкар-Олаште шочын-кушкын. Икымше образованийже дене – бухгалтер. Кӱшыл шинчымашым Озаҥ оласе (Приволжский) федеральный университетыште налын. Вара бухгалтерлан ятыр ий тыршен.
Ӱдыр бадминтон дене 1998 ийыште заниматлаш тӱҥалын. Марий Эл Республикын чемпионкыжо лӱмым 2000 ийыште сулен. Тачысе кече мартеат тудым иктат ончылтен огыл. Ӱдырын икымше тренерже – Дмитрий Леонидович Волков. Спорт мастерыш кандидатлан нормативым 2006 ийыште шуктен. Тудо бадминтон дене 25 ий модеш. Кызытат тӱрлӧ таҥасымаште вийжым терга, но ветеран семын веле. Марий Элысе командын сборныйжын спортсменже. 2022 ийыште тренерлан квалификацийым эртен, икшыве-влакым бадминтон дене модаш туныкташ тӱҥалын. Кызыт Йошкар-Оласе 1-ше номеран ФОК-ште тренерлан ышта. Занятий-влакым модаш йӧратыше кугыеҥ-влакланат эртара.
– Бадминтон шуко вийым йодшо, азартан спортлан шотлалтеш. Тудо тыгак шинча пӱсылыкым саемдаш полша. Тидыжым мый шкеат шекланенам. Тыгак ты спортышто чулым, писын куржталше, шижын шуктышо лийман, – мутланымашым тӱҥале Н.Шишкина.
– Бадминтон верч эреак чонем тургыжланен. Садланак кӧра тренер пашалан кумылаҥынам. Тӱҥ шотышто кундемыштына спортын ты видшым вияҥдыме шонымаш дене икшыве-влакым туныкташ тӱҥалынам. Тынар ий модмаште ужам да шекланем: ме каена гын, мемнам алмашташ нигӧлан. Юмылан тау, кок ий жапыште тидын шотышто шонымаш вашталтын, ӱшан шочын. Кызыт мый кок йоча группо дене пашам ыштем, тушто чылаже коло наре ӱдыр-рвезе шуаралтеш Палемдыман, йоча-влак тренировкыш кумылын коштыт. Тренировко-влак Йошкар-Оласе 11-ше номеран лицейыште эртат. Тренировкылан йӧнан спортзал кӱлеш, чаманен каласыман, кундемыштына тыгайже шагал. Садлан тидын шотышто изишак нелылык дене тӱкнаш логалеш.
Шӱдӧ утла спортсмен толын
2023 ий февральыште Марий Элыште бадминтон дене Россий кӱкшытан таҥасымаш икымше гана эртен. Тудым Наталья коллегыже-влак дене организоватлен. Тидын нерген тудо тыгерак палдарыш:
– Кунам паша верч чон йӱла, эреак ала-мом ыштыме шуэш. Тыге кундемыштына кугу кӱкшытан таҥасымашым эртарен колташ шонымаш шочын. Тушко ме бадминтон дене модаш йӧратыше спортсмен-влакым чумыренна. Ты категорийыш тӱҥ шотышто ончыч профессионально модшо, ийготым погышо спортсмен-влак пурат. Таҥасымашыш элнан тӱрлӧ регионжо гыч шӱдӧ утла спортсмен толын. Нуно Моско, Озаҥ, Нижний Новгород, Шупашкар, Новочебоксарск да моло олала гыч лийыныт. Ончыкыжым икшыве-влакланат кугу кӱкшытан таҥасымаш-влакым эртараш шонымаш уло. Кызыт 1-ше номеран ФОК-ште олмыктымо паша шукталтеш. Тушто бадминтон дене модаш йӧнан залым ыштышаш улыт. Садлан, ӱшанем, мемнан эше чылажат ончылно.
Семинар кумылаҥден
Кодшо ийын Наталья бадминтон дене тренер-влаклан тӱнямбал семинарыште мастарлыкшым нӧлтен. Тушто Российысе сборный командын тӱҥ тренерже дене тунемын. Семинарыште лиймым ӱдыр илышыштыже лийше ик эн кугу событийлан шотла. Тудын ойлымыж почеш, тушто элнан виян тренерже-влак шке паша опытышт дене палдареныт, сай шинчымашым пуэныт. Вес олаласе тренер-влак дене кылым пеҥгыдемдымымат палемдыш спортсменке. Семинарыште налме шинчымашыже йоча-влак дене пашам ыштымаште сайынак полша. Кызыт Наталья тренировко годым тудлан эҥерта.
Чынжымак, чон йӱлен шуктымо кеч-могай сомыл илышыште шке вержым мушашак. Самырык тренерын шонымашыже, тӱҥжӧ, тидлан кумылан улмыжо садак кышам кодышаш. Адакшым, 25 ийым бадминтонлан пӧлеклымеке, тудым умбакыже шуйышо еҥат лекшаш. Ӱшанена, Наталья шкеж гай тале спортсменым садак ямдыла!
Н.Шишкинан альбомжо гыч налме фото.