16 мартыште Йошкар-Олаште Ӱярня пайремым Рӱдӧ паркыште эртарат. Тидын нерген Марий тӱвыра рӱдерым вуйлатыше Василий Григорьевич Петров каласкалыш:
– Кажне ийын Ӱярня пайремым эртарыме годым ойыртемым пурташ тыршыме. Ондак «Киндым вашталтымаш» да моло йӱлам ончыктымо гын, тений «Икымше ӱдыр йӱыш» йӱла дене палдарена. Ты шотышто оҥай сценарийым ямдылыме.
Паркыштак ӱстембалым вераҥдена. Тушто озавате-влак коклаште кӱэштме мелна конкурсыштым эртарена. Жюри член-влак радамыш пагалыме еҥ-влакым ӱжынна. Тыгак икмынярын коҥга дене толыт. Уремыштак мелнам кӱэштын пукшаш тӱҥалыт. Кидмастар-шамычат шке пашаштым темлат.
А ик оҥай мероприятийже «Ӱярня баттл» маналтеш. Тыште участник-шамыч ты пайрем дене кылдалтше такмак-влакым ӱчашен мураш тӱҥалыт.
Варажым самырык-влакын кок командышт тӱрлӧ модыш дене таҥасышаш.
Мучашлан идалык мучко погынышо лавырам, кӧранымашым, уда мутым эрыктен колтымо шот дене чучылым йӱлалтена. Иктаж-кӧн, поснак йоча-влакын, иктаж-мошт коршта гын, йӱлатыме шӱч дене корштымо верым йыгалтыман, маныт. Тыгайлан калыкат, меат ӱшанена.
Ты гана вес кундем гыч ансамбль-шамычым ӱжмӧ огыл, но турист семын икмыняр палымына толаш шонена манын йыҥгыртеныт. Чылаштым пагален ӱжына.
Тидын дене Ӱярня пайремым огына мучашле. Вес мероприятийым – Йоча Ӱярням – Морко район Унчо кундемыште 21 мартыште эртарена. Кодшо кечылаште кугу команде дене миен коштна да шуко йодышым каҥашышна. Тушто йодмаш пеш кугу. Тачылан пайремыш мияш тӱрлӧ районысо 9 школ гыч участник-влак возалтыныт.