«Ӱярня толеш мунчалташ»

Эше пеш шукерте ожнак тыге муреныт мемнан кугезе коча-кована-влак. Меат, Шӱргыял школышто тунемше-шамыч, уло чон дене тиде пайремым вученак шогена. Тыге кажне ийын оҥайракын эртарен колташ тыршена. Тидлан мемнам вожатыйна Е.В.Григорьева кумылаҥден шога. А физкультурым туныктышо Е.Н.Гаврилов пайрем жапыште пайдале таҥасымаш-влакым эртара. Тений Ӱярня пайрем пургыж тылзын 24 кечынже пурыш. А школыштына ме тудым пургыж тылзын 27 кечынже рӱжге пайремлышна. Кечывал деч вара школысо кочмыверыштына пеш сай да мастар поварна М.В.Корякова да тудын полышкалышыже Н.И.Силантьева моткоч тамле мелнам кӱэштын ямдыленыт. Туныктышо да тунемше-влак дене чон канен мӱян мелнам кочна вара куанен курык гыч мунчалтышна.

Пайремлан лӱмынак школнан мастар пашаеҥже Р.С.Сидоров Ӱярня курчакым ыштен ямдылен. Родион Степанович пайрем курчакым кажне ийын шудо дене ышта. А ме, тунемше-влак, тудлан тӱрлӧ тошто вургемым мӧҥгына гыч кондена. Тений Ӱярня курчак поснак мотор лийын. Пайрем тӱҥалтышыште чыланат ик йыр шогалын, пайрем мурым йоҥгалтарышна. Ий гыч ийыш Ӱярня пайремлан такмак-влакым марий йылме туныктышына Е.В.Григорьева шкеак мыланна шонен пуа, а ме рӱжгӧ, веселан йоҥгалтарен колтена. Пайрем муро деч вара Елена Валериановна Ӱярня пайремын йӱлаж нерген мыланна каласкален. Умбакыже оҥай модыш-влак эртареныт. Тений поснак оҥай ыле. Кок команде дене таҥасышна. Лум курчакым сӧрастарыме, тудлан шовычым пидыктыме, тӱрвыжым чиялтыме, пеш мотор лектын. Мешак дене тӧрштылаш, пу сорымым вӱдвара дене нумалын куржталаш, портышкемым кышкылтын модаш, Ӱярня шовыч дене эн кужу кандырам ышташ, шергашым пуэден модаш – чылажат моткоч келшыш.

Мучашлан чыланат марий сем почеш куанен тавалтен колтышна. Ӱярня курчакым йӱлалтыме годым чыланат теле дене чеверласышна, икте-весе дечын проститлаш йодна. Тыге Ӱярня пайремна пеш сайын эртен кайыш да чоныштына нигунам мондалтдыме кышам кодыш.

Поснак таум каласыме шуэш мемнан класс вуйлатыше-влаклан, школ вуйлатышылан, вуйлатышын алмаштышыжлан, чыла туныктышо-влаклан, Кораксола книгагудо вуйлатыше Т.А.Кирилловалан да Кораксола клуб пашаеҥ-влаклан, мемнан Ӱярня пайремнам оҥайын эртараш надырым пыштымыштлан. Ме чыланат пырля мероприятий-влакым эртарен шогена. Арамлан огыл вожатыйнат эре ойла: «Лач тӱшка вий дене ыштыме сомылын лектышыже веле чоным куандарыше лиеш». Ме Елена Валериановнан ойжо дене келшена.

Екатерина Сергеева, Шӱргыял школысо «Рвезе тукым» йоча ушемын дружине вуйлатышыже.

Снимкыште: Ӱярня пайрем годым.