Мемнан Шӱргыял школышто (Морко район) «Рвезе тукым» йоча ушемна Ӱярня пайремым кажне ийын эртарен шога. Теният пайремна пеш сайын эртыш. Ме 12 мартыште школ дене Ӱярням ужатен колтышна. Вожатыйна Елена Валериановна да физкультурым туныктышо Евгений Николаевич пеш шуко конкурсым ыштышт. Кажныже мыланна оҥайын чучо. Пайрем тӱҥалтышыште, шер теммешке, курык гыч мунчалтышна, вара ӱчашымашым эртарашлан кок командым ыштышна. А капитаным ойырашлан ме, Елена Валериановна дене коктын, йоча-шамычым «Йыдалым пӧрдыктымаш» модыш дене модыктышна. Вара ӱчашымаш тӱҥале. Эн оҥайлан «Ӱярня ӱппунем», «Ӱярня шовыч», «Портышкем», «Вӱдвара дене куржмаш», «Ватрушко дене мунчалтымаш», «Канатым шупшмаш» да «Ӱштервоштыр дене куржталмаш» конкурслам шотлена. Сеҥышыш «Мелна» ден «Ӱярня» команде-влак лектыч. Нунылан чапкагазым кучыктышт. Пайрем мучко эре марий муро йоҥгыш. Школнан мастарже Родион Степановичын ончылгоч ыштыме Ӱярня курчакше йыр ме шер теммеш куштышна. Мелна деч посна Ӱярня могай пайрем? Таҥасымаш-влак деч вара чыланат мелнам кочна. Ммм, тамле!..
Ӱярня пайрем чоныштына сай кышам ятыр жаплан кода.
Егоров Дмитрий, Шӱргыял школысо «Рвезе тукым» йоча ушемын дружине председательже.
Снимкыште: Дмитрий Егоров тунемше-влак дене «Йыдалым пӧрдыктымаш» модышым эртара.