Ӱярня йор-йор — мелна чыж-чыж!

 

8-15 мартыште марий-влакын Ӱярня арняшт эрта. Ты пайремым 13 мартыште Советский район Кукмарийыште эртараш палемдыме ыле. Но коронавируслан кӧра ты пайремым эртараш чарыме. А йоча-влаклан Ӱярня пайрем 12 мартыште Советский район Ӱшнур школышто эртаралтеш. А Йошкар-Олаште тудым Чара Кремльыште 14 мартыште палемдат. Ты кок мероприятийым Марий тӱвыра рӱдер эртара.

 

Йӱла

♦ Ожно Ӱярня пайрем годым ӱярня курыкым ыштеныт, ӱярня кашташте але   йолгурыкышто мунчалтеныт.

♦ Пайремым ужатыме годым ломашварашке уржа кылтам пижыктеныт да йӱлатеныт. Тыгодым «Ӱярня каен!» манын кычкыреныт.

♦ Ӱдыр-рвезе-влак тулото гоч тӧрштылыныт, кап гыч осалым, черым поктен лукташ манын, воштыр але выньык дене вашла перкаленыт, тыге шкеныштым шинчавочмо, локтымо да чер деч йытыраеныт.

♦ Ӱярнян икымше кечынже кумалыныт. Эрдене эрак коҥгаш олтат, мелнам кÿэштыт, ÿйым шӱрен, ÿмбала-ÿмбала оптен шындат. Мелна кышыл воктене атеш шокшо шöрым шындат, тушко ушкал ÿйым пыштат, варажым тушкалтен-тушкалтен кочкыт.

♦ Пайремын кокымшо кечынже курык гыч мунчалтеныт. Кö чулым, эрден эрак курыкыш мия, издер але ийвол дене мунчалтен вола, свежа вÿдым конда, шкенжын чолгалыкшым паша гоч ончыкта.

Кумшо кечын имне дене кудалыштыныт. Имне пÿгыш яндар йÿкан оҥгырым сакеныт, ял йыр мурен-шÿшкен кудал савырненыт – оҥгыр йÿк осал вийым поктен колтен. Терыште шинчыше самырык ÿдыр-рвезе-влак тӱмыр-шӱвырым шоктены. Вара имне дене таҥасеныт. Сеҥышылан шöрмычым але коваште дене пунымо солам пöлекленыт.

♦ Кок-кум кече мÿндырнö илыше родо-шочшо деке унала коштыт, каныш жапым клубышто концертым але спектакльым ончен эртарат.

Кудымшо але шымше кечын, кунам рушарня але вес каныме кече логалеш, пайремым ужатат.

Фотошто —  тений 6 мартыште ПОШКЫРТ кундем МИШКАН селаште эртыше Ӱярня пайрем годым. Тидын нерген 12 мартысе «КУГАРНЯ» газетыште лудса!!!