10 мартыште Национальный художественный галерейыште «Япония. Талант! Вдохновение! Мастерство!» ончер почылтеш.
Тушто япон калыкын 1950-1980-ше ийласе тошто арвер коллекцийжым чумырымо. Кимоно, курчак, оби манме ӱштӧ, тӱрлӧ аксессуар, ксилографий да молат япон калыкын кидмастар улмыжым ончыктат. Коллекцийысе арвер-влак туддене пайдаланыше еҥ нерген каласкалат. Тыште вургемым, пӧрткӧргым сӧрастарыше настам, тӱрлышӧ мастар-влакын пашаштым ужаш лиеш.
Чыла экспонат япон сымыктыш дене кылдалтын, айдемын да пӱртӱсын икоян улмышт, мландыште икте-весе дене кыл улмо ончыкталтын.
