Поэт Валентин Колумбын сылнымут корныжо Морко мландыште тӱҥалын. Тудын почеламут корныштыжо — илышын чын йӱкшӧ, ончыко ӱжшӧ да кумылаҥдыше вийже улыт, садлан поэзий тӱням тачат волгалтара.
Черетан Колумб лудмаш пайрем тений 9 июльышто Морко районысо Унчо селаште лие.
«Шоруньжа уремыште
Калык – ой-ой-ой…» поэтын почеламут корнылаже тӱрыснек тидым ты кечын пеҥгыдемдыш. Республике да регион кӱкшытыштӧ лийше конкурсыш логалаш ондак районлаште ойырымо тур эртаралтын. Эн тале 105 участникым Колумб лудмашке тергаш колтеныт. Категорий дене «12 ияш марте», «12 ияш гыч 16 ияш марте», «16 ий гыч 20 ий марте», «20 ий да туддеч кугурак ийготан-влак» номинацийлаште, чынжымак, «шокшо» таҥасымаш шижалтын. Тӱҥ верым В.Колумбын возымо почеламутлажым марла, рушла, йот йылмыла дене лудмылан , тыгак поэтын почеламутшо-влаклан возымо мурылан ойырымо. Автор-влакын возымо почеламутыштым лудаш йӧн пуалтын. Икымше верым налше-влакын лӱмышт ятыр, садлан Интернетыш вераҥдена. А таче Кужэҥер районысо Ӱштымбал школ гыч конкурсыш толшо Ивановмыт еш, аваж ден ӱдыржӧ дене, палдарем.
Алёна Иванова МарГУ-што икымше курсышто марий йылмым да литературым туныктышылан тунемеш. Кок ий ончыч Морко районысо Кораксола ялыште эртаралтше Колумб лудмашке толын ыле. Тений — Унчышко. «Валентин Христофоровичын «Кӧ эҥерым йӱлалта?» почеламутшым лудмемлан икымше верым нальым. Сценыш лектым, кид-йолем ырен, чытырналт кайыш. Вет ӱмбакем тынар еҥ онча, туге гынат тургыжланымашем шулен йомо», — ойла ӱдыр.
Кужэҥер районысо Ӱштымбал школын туныктышыжо Алевтина Михайловна Ивановат конкурсыш кумылын толын, кум участникым конден. Чыланат сеҥыше радамыш логалыныт да моткоч куаненыт. Тудо В.Колумбын «Аза малтыме муро» почеламутшым лудын. Школышто историйым, географийым да обществознанийым туныкта.
«Участник-влак моткоч виян, чолга, лудын моштымышт дене кажныже ойыртемалтше лийыныт. Ты гана конкурс моткоч сай кӱкшыт дене эртен», — палемдыш жюри председатель С.Григорьева.