3 мартыште Пошкырт кундем Балтач район Кабырга тӱвыра пӧртыштӧ «Яндар йӱк-2020» конкурс эртаралтын.
Тушко ты районысо Кабырга, Ӱлыл Йыванай, Кӱшыл Йыванай, Актерыш, Тӧлвай, Нӧлпер, Мата, Мишкан, Тевыл ялла гыч участник-влак миеныт. Тыгак конкурсышто Нефтекамск олаште илыше Т.Кильмаева ден Калтаса селаште илыше С.Минабашева участвоватленыт.
Ансамбль-влак коклаште Гран-прим Йыванай ялысе тӱвыра пӧртын «Арвий» коллективше (вуйлатышыже-влак А.Янгирова ден С.Ипаева) пуэныт. 1-ше верым Мишкан ялысе «Ар» ансамбль (вуйлатышыже А.Захарова) налын, 2-шо верым – Мата ялысе «Пеледыш» (вуйлатышыже И.Ильбарисов), 3-шо верым – Актерыш ялысе «Вис-вис» (вуйлатышыже И.Айметова). Спецпризым Нӧлпер ялысе «Горница» коллективлан (вуйлатышыже С.Ахтариева) кучыктеныт.
Вокалист-влак коклаште сеҥыше радамыш А.Фатхуллина (Кабырга), Л.Валиуллина (Актерыш) да Т.Кильмаева (Нефтекамск) лектыныт. Икмыняр мурызым посна номинацийыште ойыреныт да пӧлекым кучыктеныт. Йоча-влак коклаште тыгай приз Йыванай ялын икшывыже-влак 5 ияш А.Беляев ден Л.Акузиналан логалын, Мишкан ялын – Э.Абсатарова ден Д.Сайрановалан, Кабырга ялын – Я.Фатхуллина ден А.Шайхутдиновалан. Эн кугу ийготан конкурсант-влак коклаште пӧлекым И.Калитовлан, О.Кирилова ден М.Кириловамытлан кучыктеныт.
Ончышо-влакын призыштым Е.Килимбаев, М.Валиуллина, А.Аликаева, М.Калиева, Т.Кирилова суленыт. Уста аккомпаниатор-влакынат лӱмыштым каласыман, вет нунын деч посна ик муро конкурсат эртаралтын огеш керт. Ты мероприятийыште сылне мурым мурышо-влаклан А.Сайпанов, В.Айметов, М.Валинуров, И.Ильбарисов, З.Салимьянов, В.Сафаргалиев полшеныт. А пӧлекым спонсор-шамыч – И.Шафиков, В.Васюткин, В.Хаметов, А.Алексеева, П.Абдулов, И.Айметов да Л.Тимербаева – ямдыленыт.
Икманаш, чылажат радам дене эртаралтын. Сценыш ик участник почеш весе лектын куандареныт. Ты конкурсышто 105 участник шке мастарлыкшым терген. А нунылан 140 утла зритель совым рӱж кырен.
Эльвира Терентьева.