Таче Йошкар-Оласе Курчак театрыште «Яндар» тӱнямбал фестиваль почылтеш. Тудо 16 ноябрь марте шуйна.
Фестивальыш Российысе да Китайысе 12 курчак театр ушнен. Икымше кечын жюрим да ончаш толшо-влакым Екатеринбургысо курчак театрын коллективше «Гоголь.Триптих» спектакль дене куандара.
«Яндар» тӱнямбал фестиваль кокымшо гана эртаралтеш. Тений тушко кугыжаныш веле огыл, тыгак частный курчак театр-влак ушненыт. Мутлан, Санкт-Петербургысо Курчак-влак лӱмеш театр, Мытищи гыч «В гостях у Кузи» театр, Томск гыч «2+Ку» илыше курчак театр.
Фестивальын девизше – «Курчак театр – чылалан». Сандене спектакль йоча-влаклан келшыше веле огыл, тыгак кугыеҥ-шамычланат. Тений Омскысо курчак театр Йошкар-Олаш икымше гана толеш. Усталык коллектив «Кот и Мурлик» постановкым ончаш темла.
Фестивальын организаторжо – Марий Элысе Курчак театр – «Снег» спектакльым ончыкта. Ты постановкым эн изи йоча-влаклан (10 тылзаш гыч 2 ияш марте) шындыме.
Китай гыч толшо труппо шке мастарлыкше дене куандараш да ӧрыктараш тӱҥалеш. Артсит-влак марионетке курчак-влак дене «Красочный сад кукол» спектакльым ончыктат. Постановкын негызше – хакка калыкын йӱлаже да культуржо.
Театрын ВК-се лашыкше гыч налме.