У Торъял районысо Татарэҥер кундемыште шӱгарым лишыл жапыште у пече дене йыр печен налшаш улыт. Паша верысе темлымаш-влак программе почеш шукталтеш.
‒ Калыкын йӱклымыж почеш, кодшо ийыштак ышташ шонымо ыле, но программын йодмыж семын кокымшо йыжыҥым эртен кертын огынал. Тений чылажат шонымо семын лийшаш. Проектын акше ик миллион утла теҥгешке шуэш, тышеч 100 тӱжемжым шке погенна, чылалан пеш кугу тау, ‒ манеш верысе кумылзак айдеме, У Торъял район гыч Марий калык конгресс исполкомын чолгаеҥже Николай Сидоркин.
Паша кузерак шукталтмым тудынак колтымо фотошто да видеошто ужаш лиеш.
Торъял кундемыште калык вий дене тыгак Човыксолаште памаш йыр вер-шӧрым тӱзатат, ший гай вӱдлан погынаш пурам келыштарат.
‒ Ончычсыжо тоштемын, сандене верысе калыкым чумырен, тиде кугу пашалан пижме. Тидлан ты ялынак шочшыжо, «Ончыко» журналын тӱҥ редакторжо Игорь Поповлан тауштыман, тудо шкежат полша, молымат кумылаҥда.
А кӧ манеш: ялыште илаш йокрок? Тарванылат гын, нимынярат йокрок огыл, йырым-йыр тӱзатыме пашам шуктен, илыметат шуэш.
