Вес ий 1 январь гыч Марий Элыште самырык педагог-влаклан у выплате лиеш, увертара Образований да науко министерстве.
Тыгай пособийым кугыжаныш да муниципальный туныктымо тӧнежыш (ешартыш шинчымашым пуышо тӧнеж ты радамыш ок пуро) вуз але профессиональный шинчымашым пуышо организаций деч вара туныктышылан икымше гана пашаш толшо-шамычлан тӱлат. Тудым туныктышо специальностьлан кум ий наре тунемше да промежуточный аттестацийым эртыше вузын студентше-шамычат налын кертыт. Кыдалаш профессиональный шинчымашым пуышо организацийын ийготыш шушо да пытартыш курсышто тунемме годым школ деч ончычсо да тӱҥалтыш класслам туныктымо программе почеш пашам ышташ тӱҥалше студентше-влаклан пуат.
Пособийым налше еҥ школышто вич ий деч шагал огыл пашам ыштышаш. Марий Элысе Образований да науко министерствын увертарымыж почеш, олаште але ола шотан илемлаште туныктымо тӧнежлаш пашаш пурышо еҥлан 100 тӱжем теҥге, яллаште тыршыше специалистлан 300 тӱжем теҥгем ик гана тӱлат.
Интернет гыч налме фото.