Могай пашам молодежный парламент шуктен шога? Ялысе илышым саемдаш манын, парламентын еҥже-влак мом ыштат? Тиде да моло нерген Волжский районысо Молодежный парламентын председательже Андрей Клинов дене мутланышна.
Тудо Пӧртанур ялыште ила. Изинек мер пашалан, спортлан шӱман кушкын. 2011 ийыште МарГТУ-со (кызыт ПГТУ) механико-машиностроительный факультетым тунем пытарен. Андрей Волжск оласе Марий целлюлоз-кагаз комбинатыште инженерлан пашам ышта. Тудын дене 2013 ийыште Марий самырык тукымын слётыштыжо палыме лийынна. Ты слёт «Молодёжный правительстве» темылан пӧлеклалтын ыле. Слётысо правительствыште Андрей премьер-министр пашам шуктен. Очыни, тидат самырык рвезын ончыкылык пашажым рашемдаш полшен.
— Андрей Вениаминович, кунамсек Молодежный парламентын председательже сомылым шуктет?
— Волжский районысо депутат-влакын погынышт пеленысе Молодежный парламентыш 11 еҥым 2014 сентябрьыште сайленыт. А председательлан мыйым тудо ийынак декабрьыште шогалтеныт. Ныл ий ынде тиде пашам шуктен шогем. Тений парламентыш сайлымаш лиеш. Положений почеш, 16-30 ияш чолга ÿдыр-рвезе-влак парламентын членже лийын кертыт. Мылам августышто 30 ий темеш.
— Ныл ийыште парламентын членже-влак могай пашам ыштеныт? Мо дене калыклан пайдам конденыт?
— Шуко паша ышталтын. Мутлан, Марий Эл Республикысе МВД-ын ГИБДД управленийжын специалистше-влак дене районыштына «Засветись» акцийым эртаренна. Пычкемышыште койшо светоотражающий браслет-влакым йолешке-шамычлан пуэдыме, корно правил нерген ушештарыме.
Волжский районышто кандаш ял шотан илем уло. Тылзылан ик гана районысо пашам ыштыше самырык тукым ушем дене пырля иктаж илемысе администрацийыште погынымашым эртарена. Ышталтме да ыштышаш пашана дене калыкым палдарена.
— А кундемыште марий йылмым, йÿлам арален кодымо нерген ойлаш гын…
— Чаманен каласыман, тидын шотышто шагалрак пашам ыштыме. Карайыште лийше «Портышкем пайремым» Молодежный парламентын еҥже-влак эртараш полшеныт. Тушто портышкемым чиен, футболла модмо турнирым эртаренна. Шочмо Пöртанур ялысе тÿвыра пöртыштö марий калыкын ожнысо илышыжым ончыктышо, йÿлаж дене палдарыше тоштерым почаш шонена. Тидлан мыйын чонем шукертсек йÿла.
— Самырык парламентарий-шамыч деке еҥ-влак иктаж полышым йодын толыныт мо?
— «Местные инициативы» программыште участвоватленна да Волжский район администраций полшымо дене Пöртанур ялыште хоккей коробкам ыштыктенна. Тиде проектым илышыш пуртымеке, Ярамарийыште илыше самырык еҥ-влак мемнан деч ялыштышт тыгаяк коробкам чоҥаш полышым йодыныт ыле.
— Молодежный парламентыште ик тыгай нелылык улмо нерген колынам: тудын участникше-влак чыланжак огыл тÿрлö мероприятийыште чолгалыкыштым ончыктат. Тыгак мо?
— Мом шылташ, тыгай нелылык уло. Умылыман: парламентыште школышто тунемше, пашам ыштыше самырык еҥ-влак тыршат. Ик-кок ий жапыште чон йÿлен пашам ыштат гын, варажым икте марлан лектеш але ÿдырым налеш да шуко жапым ешлан ойыра, весе олашке тунемаш кая. Конешне, чылаштым иктыш чумыраш нелырак лиеш. Туге гынат, парламентын пашаже тидлан кöра огеш шогал.
— Парламентын членже-влак мероприятийлам эртарымаште веле огыл участвоватлышаш, очыни. Законым лукмаштат надырже лийшаш.
— Мо тугай парламент да могай тудын пашаже, чыланжак огыт умыло. Шукынжо тудым мер организацийлан шотлат. Самырык парламентарий-влак тÿрлӧ пайремым, вашлиймашым эртарышаш, но эн тÿҥжӧ, содыки, нуно законодательный пашаште участвоватлышаш улыт. Тачанан кечынже, йоча-влакым аралыме тÿнямбал кечыште, 1 сентябрьыште кочывÿдым огыт ужале. Тиде законодательный инициативе Марий Эл Республикысе молодежный парламентынат лийын.
— Мер паша самырык-влаклан кушкашышт могай йöным пуа?
— Эн ончыч ӱдыр-рвезе-влак калык ончылно выступатлаш, раш да чаткан мутланаш тунемыт. Оҥай еҥ-влак дене вашлийын, шукылан тунемаш, пайдале вашкылым ышташ лиеш.
Мый 2017 ийыште Памар ял шотан илемысе депутат-влак погыныш депутатлан сайлалтынам. Депутатлан пашам ышташ неле. Мый декем тÿрлє ийготан еҥ-влак тургыжландарыше йодышышт дене толыт. Кажныжлан айда-лийже огыл, а раш вашмутым пуэм, кертмем семын полшаш тыршем. Памар ял шотан илемым вуйлатыше Алексей Васильевич Калабашкин дене пашам ыштена. Тудо тӱҥалме пашам мучаш марте шуктышо айдеме. Ялыште калыклан илаш йєнан лийже манын тыршена. Кызытсе саманыште районлаште паша вер шагал. Тидат шкешотан нелылыкым луктеш: самырык-влак олалаш илаш куснат, тидлан кєра южо изирак ял эркын дене пыта.
— А тыйын олаш илаш каяш кумылет уке?
— Пӧртанур – мыйын шочмо верем. Тудым мый чот йӧратем да аклем. Тыште кеҥежымат, телымат, шыжымат, шошымат сай да ласка. Олаш канаш але иктаж паша дене миен толаш кеч-кунам лиеш, Озаҥ ола – воктенак. А илаш да пашам ышташ шочмо кундемыштемак коднем.
Тыгай чолга самырык еҥ-влаклан кєра ял ила да тӱзлана. Андрей Вениаминович могай яллашке вӱдым але газым пурташ, корным ышташ кӱлеш, пала, да шижалтеш, тидын шотышто тудо пашам кыртмен ышта. А сай вашталтышым ужмеке, землякше-влак дене пырля куана.