Ялысе илыш чонлан лишыл

Лидия Дмитриева, «Звениговский» шыл комбинатыште пашам ышта.

«Ешем дене Морко районысо Элекэҥер ялыште илем. Андрей пелашем дене «Звениговский» ялозанлыкыште ик бригадыште ыштена. Мый кандаш ий тушко кудалыштам. Эрдене ныл шагатлан кынелам, нылытат пелылан ял вуйышто совхозын автобусшо вуча. Ял гыч 12 еҥ тыге кудалыштына. А кастене визытат пелылан мӧҥгыштӧ лийына. Мылам пашам келша, жапыштыже кает, мӧҥгӧ толат да сурт сомылымат ыштен шуктет. Оксам тӱлат, талон дене кочкаш пукшаш да тылзылан ик гана колбасам пуат», – мане Лида.
Тудо Моркысо 24-ше номеран СПТУ-што штукатур-малярлан тунемын. Садлан ты сомылымат ыштен мошта. Ялыштышт у пӧртым чоҥат, леведыныт, пластик окнам шынденыт. Ынде пӧрт кӧргӧ сомыл кодын.
«Кызыт шуко ӱдырамаш Москошко пашам ышташ коштеш.Тушто ала-кушто илыман, ала-кушто малыман, шонем: шке сурт деч сай нимо уке. Адакшым суртым коден кает да тушто мо ышталтмым от пале. Ӱдыр йочана кушкын шуын, ача-ава пеленак тудо илышаш шукта. Паша верна уло, тидлан тау», – ойла Лида Дмитриева.
Ялысе моло ӱдырамаш-влак семынак тудынат сурт сомылкаже лыҥ уло. А пелашыже да ӱдыржӧ Лидукым моткоч йӧратат. Анюта ӱдырышт кажне пайремлан мом-гынат пӧлекла. Теве Йӧратыше-влакын кечыштлан ача-аважлан пледым пуэн. Андрей пелашыже Лидалан эреак роза пеледышым да духим кучыкта, ӱдыржымат пӧлек дене куандара.