Параньга район Ермучаш ялыште илыше шуко шочшан Гордеевмыт еш ятыр вольыкым ашна, кугу кумдыкышто пакчагӧргым шында.
Кум ӱдыран ача-ава
Кужэҥер район Осыпъял ӱдыр Эвелина ден Параньга район Ермучаш каче Сергей 2015 ийыште ешым чумыреныт. Нуно рвезын шочмо ялыштыже ача-авашт дене пырля илат. Эвелина ден Сергей кум ӱдыран ача-ава улыт. Полина – 10 ияш, Анфиса – 8 ияш. Нуно Матародо кыдалаш школышто шинчымашым погат. Оля – межнеч ӱдыр. Тудлан улыжат – кок ий, верысе йочасадыште шуаралтеш.
Эвелина Марий Эл Республикысе Параньга районысо депутат-влакын погыныштыжо экспертлан пашам ышта. Сергей ончыч кугу олалашке тӱрлӧ пашашке кудалыштын. А 2023 ий годсек районысо Калыкым социально аралыме пӧлка дене вольыкым ашнаш соцконтрактым пеҥгыдемден да ты пашам вораҥдараш тӱҥалын. Тудо шуко презым онча.
– Пелашем моткоч пашаче. Тудын чыла сомылланат кид-йолжо толеш. Ешыштышт ондаксекак ятыр вольыкым ашненыт. Ойлымыж почеш, вӱташтышт 2-3 ушкал, ятыр презе да ӱшкыж, шорык, тӱрлӧ сурткайык эреак лийыныт. Соцконтрактым пеҥгыдемдымыж деч ончыч, тошто вӱтам пужен, кугу, чапле оралтым шкеак чоҥен. Тыгак вольыкым пукшаш лӱмын кормокухньым весым ыштен. Ончыкыланат ыштышаш пашаже ятыр. Жап да йӧн веле лийышт.
Кызыт кугурак да изирак презым ашнена. Мыланна ты сомылым шукташ ача-авана чот полшат. Садлан нуно тӱҥ полышкалышына да эҥертышна улыт, – ойла Эвелина.
Ялыште илет – пашам йӧратыман
Гордеевмытын шке пӧрт, монча да моло оралте. Сергей шкеак мансардым, шокшо верандым чоҥен. Кызытат иктым-весым олмыкта, вет ялыште илет гын, суртым эреак тӧрлен шогыман. Вольыклан кургым ситараш манын, кок пакча пареҥгым шындат, кугу кумдыкышто пакчагӧргым куштат.
– Ӱдыр-шамыч чыла пашам ыштен моштат. Кеҥежым пакчаште шӱкшудым кӱрыт, йыраҥым пушкыдемдат. Шудым ыштыме годымат ӧрдыжеш огыт код. Пӧртым эрыктыме, когыльым кӱэштме годым эреак пеленем улыт. Йочам изинек пашалан туныкташ тыршена, – манеш кум шочшан ава.
Ялыште илыше самырык еш-влак шкенышт дене кугешнаш таратат. Нуным, чынжымак, геройлан шотлыман. Вет кызыт шукынжо кугу олашке каяш тыршат. Конешне, тидлан тӱрлӧ амал лийын кертеш. Но ялыште кодшо-шамыч тидын шотышто молодецак улыт!
– Торашке илаш каяш ушыштынат лийын огыл ала мо. Пелашемат тидын нерген ик ганат мутым луктын огыл. Ме коктынат ялыште шочын-кушкынна, тысе илышын чыла гаяк шӧрынжым палена. Шочмо суртыштемат ача-авам ятыр вольыкым ашненыт да шуко пакчагӧргым шынденыт. Садлан мыланна чылажат палыме да лишыл, – палемда Э.Гордеева.
Жапым пайдалын
Гордеевмыт паша дечат каналтен моштат. Каникуллан икшыве-влак дене Йошкар-Олашке толын каяш жапым муаш эреак тыршат. Ӱдыр-шамыч дене кинотеатрыш, карусельыш, паркыш да моло вереат коштыт. Йоча-шамычлан келыштаралтше иктаж-могай мероприятийлашкат кумылын ушнат. Ава Йошкар-Оласе набережныйыште кастене кошташ йӧратымышт нергенат ойлыш. Садлан тушко кастене лӱмын толын каят.
– Еш дене жапым пырля эртарымылан нимо огеш шу. Ме лудаш моткоч йӧратена, садлан кастене коча-кова, ӱдыр-влак да ме пелашем дене чӱчкыдын тӱрлӧ газетым, журналым, книгам шергалына. Йоча-шамыч тыгак сӱретлаш, бисер дене пидаш, эпоксидный киш дене шинчылташ кумылан улыт. Яндар южышто жапым шуко эртарена. Кеҥежым чодырашке тӱрлӧ емыж-саскалан лектына, телым ече дене коштына, – каласкала Эвелина.
Гордеевмытлан шуко шочшан еш семын кугыжаныш деч икмыняр полыш пуалтеш. Йоча-влак школышто оксам тӱлыде кочкыт, корнылан да коммунал услуго дене пайдаланымылан икмыняр ужашыжым пӧртылтат. Тидыжат могай-гынат шӱкалтыш, палемда ава. Тыгак нуно регионысо ава капитал дене пайдаланеныт.
Шуко йочам ышташ неле огыл, тӱҥжӧ – нуным воспитатлыман да илышлан туныктыман, маныт ача-ава. Эвелина ден Сергей Гордеевмыт шке икшывыштлан пример улыт. Ӱдырышт-влак нунын гаяк чолга, изинекак паша деч лӱддымӧ кушкыт!
Еш альбом гыч налме фото-влак.