Марий Элыште агропромышленный комплексым вияҥдымаш – элыштына кочкыш сатум ямдылымашын кугу ужашыже.
Марий Элым Вуйлатыше Ю.Зайцев Кугыжаныш Думышто аграрный йодыш дене комитетын председательже В.Кашин ден статс-секретарь – Российысе ялозанлык министрын алмаштыже М.Увайдов дене вашлийын мутланен.
Юрий Зайцевын мутшо почеш, регионысо агропромышленный комплекс тӱрлӧ кугыжаныш программе, федеральный рӱдерын полшымыж дене шке сатужым палынак шукемден толеш.
Кайыквусо шылым ямдылыме дене Марий Эл ПФО-што кокымшо верым налеш, Российыште – кандашымшым. Республикна пакчасаскам ончен куштымо дене округышто эн ончылно кая, а элыштына визымше верым айла. Ик ушкал деч шӧр лӱштыш 9 тонн утлаш погына, а тидыже чыла субъект-влак коклаште 16-шо вер. Пакчасаскам, пареҥгым, муным да шӧрым ыштен налмаште республик калыкын йодмашыжым ситара, а южо направленийже дене планым икмыняр пачаш шукырак шукта.
Максим Увайдов палемден: Марий Эл шкаланже веле огыл ситарышаш, элнан кочкыш сатужо шотышто надырым пыштышаш, поснак перерабатыватлыме отрасльлан кугу тӱткышым ойырыман. Юрий Зайцев тиддене келшымыж нерген ойлен. Варажым участник-влак ялысе кумдыкым комплексно тӱзатыме программым каҥашеныт, мландым ялозанлык пашалан ойырымо, специалист-влакым ямдылыме нерген кутыреныт.
📷 Марий Элым Вуйлатышын пресс-службыжо.