Марий Элым Вуйлатыше Морко район Шеҥше ялысе фермер озанлыкыш миен коштын.
Тушто амалкалче Сергей Григорьев пасушто пакчасаскам да пареҥгым ончен кушта. Кызытсе жаплан келшыше кок складше уло: пакчасаскалан 1500 тонн пурыман вер, пареҥгылан 1200 тонн пурыман да сортироватлыме оборудованиян вер. Тидыже саскам сайын аралаш йӧным пуа.
Сергей Григорьев шке пашаштыже кугыжанышлан эҥертен мошта. Тудлан еш фермысе пашам шуктымо программе почеш 4 млн теҥгеаш грантым пуэныт, туддене GL 430 картофелесажалкым налын. А 6 млн теҥгеаш грант дене пареҥгым фасоватлыше да сортироватлыше оборудованиян лийын. Тыгак фермерлан «Акселерация субъектов малого и среднего предпринимательства в Республике Марий Эл» проект почеш 1,3 млн теҥгем ойыреныт, тудым ялозанлык техникым налмылан тӱлен.
2024 ийыште фермер 13 процентлан шукырак сатум ужален, тидыже 19,3 млн теҥгешке шуын. Кодшо ийын тудо 434 гектарыште шынден, тидыже ончычсо ий деч 87 гектарлан шукырак. Тыге 1618 тонн пакчасаскам да 1372 тонн пареҥгым поген налын.
Шушаш кок ийыште яра кийыше 84 гектарыштат шке сомылжым ворандараш палемден.
С.Григорьев шке кочкыш сатужым кооперативын членже-влаклан ужала. 2024 ийыште нуно 86 тонн пакчасаскам да 808 тонн пареҥгым налыныт.