14 октябрьыште Марий Эл Республикысе Ялозанлык да продовольствий министерстве У Торъял районысо «Первый Май» колхозышто семинар-совещанийым эртарен.
Тушко Марий Эл Республикысе ялозанлык да продовольствий министрын сомылжым шуктышо А.В.Кондратенко, республикысе Ветеринарий комитет председательын алмаштышыже С.А.Зарбалиева, «Первый Май» СХПК-СХА председатель А.А.Новиков, «Биогенетический центр «Поволжье» ООО-н генеральный директоржо Р.И.Силантьев лийыныт.
Тений индеш тылзыште вольыкым ончымо паша лектыш нерген А.В.Кондратенко каласкален, шӧр лӱштышым шукемдыме да тудын качествыжым саемдыме шотышто ончыкылан задаче-влакым палемден.
Ты кечын ушкалым аппарат дене лӱштышӧ-влаклан Почётан грамот-влакым, окса пӧлекым кучыктеныт. Семинарыш толшо-влак «Первый Май» колхозын Чӱксола ялыште верланыше тӱкан шолдыра вольык комплексышкыже миеныт, ушкалым пукшымо да ашныме условий дене палыме лийыныт.
Тыге ялозанлык предприятийла гыч толшо вуйлатыше ден специалист-влак шӧрым лӱштен налме шотышто икте-весышт деч опытым пайленыт.
