12 октябрьыште Ялозанлык пашаеҥ-влакын кечышт палемдалтын. Тачысе саманыште кажне илалше еҥын колхоз илыш верч чонжо коржеш. Кузе уке гын, вет нунын уло ӱмырышт колхозышто эртен.
Лач ты пайрем лӱмеш Кинер кундемын ялозанлык пашаште тыршыше ветеранже-влакым Кораксола тӱвыра пӧртышкӧ чумырышна, 24 еҥ толын. Тӱҥ шотышто Яраҥсола ялыште илыше-влак погыненыт. Чылаштым «Муро кумыл» фольклор ансамбльнан тале гармоньчыжо, Яраҥсола ялын ик эн чолга эргыже Вениамин Андреевич Борисов иктыш чумырен.
Соцпашаеҥ Римма Андреевна Герасимова Кинер кундемыште эн чолга. Кажне ийын Илалше-влак лӱмеш пайремым эртараш полша да Ялозанлык пашаеҥ-влакын кечышт лӱмеш эртыше пайремымат эртараш пеш кугу надырым пыштен. Шке ончымо илалше еҥже-влакым чылам тӱвыра пӧртышкына конден.
Жапше годым Кинер кундемыште илыше калык «Авангард» колхозышко пурен. Жап эртен, да ик колхозым кокытлан шелыныт. Тыге «Знамя» колхоз шочын. Тудо жапысе эн тале колхоз вуйлатыше-влак семын В.Г.Васильев, И.В.Кириллов, В.А.Николаев шотлалтыт.
Пайрем касыште кажне ветеранлан мутым пуышна. Эн ончыч агроном О.М.Александрова уло ӱмыржым «Авангард» колхозлан пӧлеклымыж нерген каласкалыш. Йӧратыме «Агроном» мурыжымат йоҥгалтараш йодо. Зоотехник Р.Н.Ивановат ятыр ойлыш да йӧратыме мурыжым рӱж муралташ таратыш. «Знамя» колхозын инженерже В.А.Борисов, кассирлан тыршыше Г.П.Борисова, сӧсна ончышо-влак З.С.Егорова, Ю.М.Степанова, «Авангард» колхозын бухгалтерже В.Г.Игнатьева да молат чон коржмыштым каласкалышт. Тыгодым колыштшо еҥын кумылжо тодылалтеш, шинчавӱд толеш. Кузе уке гын, вет таче колхоз уке. Но калык ӱшана: ала илыш сай велыш вашталтеш.
Елена Григорьева, Кораксола тӱвыра пӧрт вуйлатыше.
Снимкыште: Ялозанлык пашаеҥ-влакын кечышт лӱмеш касыш чумыргышо-влак.
Авторын колтымо фото.
