28 майыште Россий Банкын Волго-Вятский кугыжаныш управленийжын Марий Элысе отделений-национальный банкыште ялыште да мӱндыр верлаште илыше-влаклан финанс услугым пуымо шотышто пашаче группын заседанийже лийын.
Тушто регионысо Правительствын, банковский секторын, кыл оператор ден почто службын еҥышт вашлийын мутланеныт. Нуно социальный инфраструктурышто наличке деч посна тӱлымашым вияҥдыме нерген кутырен келшеныт. Тидлан районлаште финанс сервисым налаш шукырак йӧным ыштат, мобильный банковский офис-влакым ешарат. Тылеч посна «Наличные на кассе» услугым пуышо ужалыме верлам шукырак почыт.
– 2022 ий годсек Марий Элыште финанс шотышто ятыр паша ышталтеш. Кундемыштына 2025 ий тӱҥалтыште финансовый доступностьын коэффициентше 68 процентыш шуын, тидыже кокла показатель деч кугурак. Мемнан шонымаште, тыгай йӧн дене эн тораште илыше-влакат пайдаланышаш улыт, – каласен Марий Эл Правительстве Председательын икымше алмаштышыже Дмитрий Троицкий.
Тыгак тора яллаште финанс услугым пуышо сельский кабинетлам ышташ. Тушто еҥ-влак ЖКХ услугылан да налогым тӱлен, страховой договорым ыштен, вкладым почын да Госуслуго портал дене пайдаланен кертыт. Тыгак нине кабинетлаште финанс грамотность шотышто мероприятийым эртараш лиеш. Пилотный проект тений шыҥдаралтшаш, а вара уло республикым авалтышаш.
Эльвира Терентьева.