Медведево посёлкысо «Витязь» спортклубын дзюдоистше-шамыч кеҥеж канышым пайдалын эртареныт. 12 гыч 26 июнь марте нунылан «Яльчик» ер воктенысе «Политехник» базыште сбор эртен.
Спортсмен-шамыч кажне кечын тӱрлӧ спорт таҥасымашыште вийыштым тергеныт. Шашке да футбол дене модмаште, кроссым куржталмаште, иймаште, капкылым нӧлтымаште, дартсым кышкымаште, кучедалмаште, полосам тӱрлӧ чарак дене эртымаште да моло ӱчашымашыште таҥасеныт. Тыгак походыш коштыныт, колым кученыт, Яльчик ер воктенысе шуко мотор верлам шымленыт, тул воктене гитар сем почеш мурым муреныт. А кастене спортсмен-влак дискотекыште каненыт. Икманаш, спортивный сбор мастарлыкым веле огыл нӧлташ, тыгак уш да чон дене канаш йӧным ыштен. Дзюдоист-влак у тунемме идалыклан ямде улыт!
А.Сергеевын фотожо.