Марий Эл Республикысе образований да науко министерстве, Андре Мальро лÿмеш 26-шо номеран гимназий, Марий кугыжаныш университет XIV Всероссийский форумым ямдыленыт. Мероприятий 22 апрельыште Йошкар-Оласе тунемме учреждений-влакын тӱрлӧ площадкылаштышт онлайн да оффлайн режимыште эртен. Марий Элын опорный вузшо ден республикыште межкультурный компетенций направлений дене пашам ыштыше тунемме учреждений-влак ятыр ий пырля пашам ыштат, тиде мероприятият сай йӱлаш савырнен.
Форумын пашашкыже республикысе туныктышо ден тунемше-влак, Марий кугыжаныш университетын преподавательже ден тӱрлӧ элла гыч шинчымашым погаш толшо студент-влак, Татарстан Республик, Моско, Угарман, Саратов олала гыч 400 чоло участник ушнен. Латвич секцийыште 350 еҥ доклад да презентаций дене выступатлен. Лончылымо йодыш-влак Россий – Франций – Марий Эл тематике дене кылдалтыныт, сымыктыш, сылнымут, лингвистике, лингвокультурологий, биологий, медицине, спорт аспект-влак йыр чумыргеныт.
Форумын тӱҥ номинацийже-влак коклаште Поэзий салон (Salon poétique. Belles pages de la poésie), «Франций, Россий, Марий Эл: историй, сымыктыш, йӱла (Monde de multiples cultures) руш да француз йылме дене ямдылыме шанче да усталык проект конкурс, Франкофоний тӱня (Planète De La Francophonie), Шанче факт-влак салон (Atelier scientifique), сӱретсымыктыш таҥасымаш (A l’atelier du peintre) лийыныт.
Тыгай мероприятий – тунемше-влаклан науко аланыште шке мастарлыкыштым ончыкташ сай йӧн, тыгак кӱшыл шинчымашым пуышо учрежденийлан школлаште профориентаций пашам шуктен шогашыже полша.
Форумын программыже поян лийын: секцийласе заседаний деч посна руш да йот йылме-влак дене возымо произведений негызеш возымо сочинений конкурс, муро фестиваль эртаралтыныт. Форумышто сеҥыше ден лауреат-влак грамот дене палемдалтыныт.
Ф.Я. Хабибуллина, педагогике науко кандидат, МарГУ-н доцентше,
И.Г. Иванова, филологий науко кандидат, МарГУ-н доцентше.