Выпускник, утыжым ит тургыжлане,

але Экзамен деч ончычсо стрессым кузе сеҥыман?

 

  1. Сайлан ӱшаныман. Тидлан, мутат уке, ончылгоч ямдылалтман. Ик кечын, мутлан, 15 примерым решатлет гын, вес кечын шукырак тунемаш тыршыман. Ушышто сай шонымаш лийшаш.
  2. Экзаменым сдатлыме кечым ончылгоч илен лекман. Ушышто ты кечысе образым сӱретлыман. Тидыже тӱрлӧ йӧндымӧ ситуаций деч тендам арала. Экзамен годым вуйушлан яндарын пашам ышташ полша.
  3. Тӱҥ экзамен деч ончыч пробный экзаменым шканет чӱчкыдын эртараш тырше. Тидыже кугу опытым пуа.
  4. Каналташ жапым му. Организмлан тыгак каныман. Яндар южышто кошташ, спортзалыште шуаралташ, дискотекыш миен толаш сай лиеш.
  5. Творчестве тыгак стрессым кораҥдаш полша. Сӱретлынет гын, молан тидым ышташ огыл? Ала почеламутым возынет? Мураш тунемнет? Тидат сай йӧн.
  6. Витаминлан поян кочкышым кочкаш, малаш ит мондо. Стресс годым кофем йӱаш, углеводан кочкышым кочкаш огеш темлалт. Шере кочкышым мӱй, пӱкш дене алмашташ лиеш. Нунылан кӧра уш сайынрак пашам ышташ тӱҥалеш. Тыгак греческий йогурт, авокадо, кол, модо, корице пайдале лийыт.
  7. Эмоцийым шылтыман огыл. Экзамен шотышто чот тургыжланет гын, лишыл еҥет-влак дене тидын нерген мутланаш ит лӱд. Шарне, нуно тыйын эн ӱшанле да полшаш ямде еҥет улыт!