
2024 ийыште 31 январь гыч 1 октябрь марте «Ава да йоча-влак калык вургем дене» тӱнямбал фотоконкурс эртаралтын. Ты конкурсышто да «Шочмо йылме дене азам малтыме муро» посна номинацийыште Звенигово район гыч Николаевмыт еш сеҥышыш лектын.
Екатерина Осмин Йыван лӱмеш Керебеляк школ книгагудышто пашам ышта. Пелашыж дене кум икшывым ончен куштат. Степан кумшо классыште шинчымашым пога, Артём ден Магдалина йочасадыш коштыт.
Чолга еш ятыр мероприятийыш ушна. Поснак еш идалыклан пӧлеклалтше «Всей семьёй» проект сай кумылым луктын.
– Ты фотоконкурслан фотом ышташ да клипым сниматлаш кӱлын. «Энсай» марий сувенир салонышто шкаланем да ӱдыремлан тувырым ончылгоч йодын ямдыленам. Муро шотышто ятыр жап шонкалаш логалын. Пырля пашам ыштыше-влак интернетысе икмыняр вариантым темленыт. Тыге эн сайжым, «Аза малтыме калык мурым», ойырен налынам. Ӱдыремат эше изирак (кок ияш), мутшат мемнан ешлан келшен толшо. Кеҥежым Звенигово районысо Чуваш-Отар ялыште клипым войзенна. Сеҥышыш лекме нерген уверым пален налмек, моткоч йывыртенна, – палдара Е.Николаева.
Конкурсышто ойыртемалтше-влакым 2024 ий 15 ноябрьыште Моско олаште «Женщины третьего тысячелетия» кумшо тӱнямбал концертыште саламленыт. Тушко Екатеринат миен коштын.
Палаш оҥай:
Конкурсыш 6453 йодмаш пурен. 2560 пашам ойырен налме. Нунын кокла гыч 76 паша сеҥышыш лектын, «Шочмо йылме дене аза малтыме муро» номинацийыште 23 ешым палемденыт.