Тиде кечылаште Марий Элысе вузлаште, ссузлаште приёмный кампаний пашажым тӱҥалын. Выпускник-влак, келшыше профессийым ойырен налаш манын, тӱрлӧ факультетыш да институтыш йодмашым пуат. Тений вузлаште бюджетный вер шуко ойыралтын мо? Кушко йодмаш кажне ийын пура? Могай у профессий ден специалист-шамычым тений ямдылаш тӱҥалыт? Тунемаш пурымо годым мом шотыш налман? Нине йодыш-влаклан вашмутым МарГУ-што да Волгатехышто кычалме да рашемдыме.
Китай йылмым туныкташ тӱҥалыт
МарГУ-што кызыт 15 факультет ден институт улыт. 2023-2024 тунемме идалыклан кокла профессиональный, бакалавриат, магистратур, ординатур дене шинчымашым налаш чылаже 2041 бюджетный верым ойырымо. Тушто естественный, аграрный, гуманитарный науко, медицине, экономике да управлений, цифровой технологий, педагогике, юриспруденций да моло алан дене кылдалтше 100 направлений дене специальность уло.
Приёмный кампаний шке пашажым 20 июньышто тӱҥалын. Кажне кечын манме гай тудо абитуриент-влакым вуча. Пашан кузе кайымыж шотышто МарГУ-со информационный политике управленийын вуйлатышыже Александра Сергеевна Сазанова дене мутланышна.
– Ӱмашсе дене таҥастарымаште бюджетный вер ны шуко, ны шагал огыл. Туге гынат кажне ийын вер ятыр ойыралтеш. Врачлан тунемаш шонышо-влак целевой направлений дене оксам тӱлыде тунемаш пурен сеҥат.
Кажне ийын МарГУ-што у направлений почылтеш. Тений йот йылме-влак факультетыште англичан ден китай йылмылам туныктышо-влакым ямдылаш тӱҥалыт. Юридический факультетыште «Цифровое право» у направленийым илышыш пуртымо. «Реклама и связи с общественностью» специальность дене специалист-влакым тений кокымшо ий ямдылаш тӱҥалыт.
Тунемаш пурымо годым тӱрлӧ сеҥымашлан ешартыш балл (3,5,10 балл) пуалтеш. Мутлан, ГТО значок дене палемдалтше, Россий ден тӱнямбал классан спорт мастерыш кандидат лӱмым налше, «отличий» аттестат дене тунем пытарыше, олимпийский да паралимпийский модмашлаште чемпионыш, призёрыш лекше-влаклан 10 балл ешаралтеш.
Чумыр ончалаш гын, медицине институтышко, юридический, экономический факультетлашке шуко йодмаш пура.
Кеч-могай факультет ден институтлаште оксам тӱлен тунемаш лиеш. Тидын шотышто абитуриент-влак юридический факультетым да медицине институтын «Лечебное дело» ден «Педиатрий» специальностьшо-влакым ойырен налыт, – мане А.Сазанова
ЕГЭ-м шотыш налме дене 25 июль марте йодмашым пуаш лиеш. Йодмашым приёмный комиссийыш намияш, тыгак абитуриентын личный кабинетше але Госуслуго портал гоч электрон йӧн дене колташ лиеш.
Туныктышым ямдылат
Волгатехыште чылаже кум институт ден куд факультет улыт. Тушкат тунемаш пураш шонышо ятыр. Тений бакалавриат ден специалитет программе-влак дене тунемаш чылаже 1659 бюджетный верым ойырымо. «Магистратуро» направленийлан 485 верым пуымо. Тыгак очно формо дене кокла профессиональный шинчымашым налаш 775 бюджетный верым ыштыме. Чумыр ончалаш гын, тений Волгатехыште 2942 бюджетный верым ямдылыме.
«Бакалавриат» направленийын тӱрлӧ формыж дене оксам тӱлен тунемаш 895 верым, магистратур дене 327 верым ыштыме.
– Ӱмаште «Бакалавриат» ден «Специалитет» направленийла дене очно тунемаш 1301 бюджет вер лийын. Магистратур шотышто тений тудо изиш шагалрак. Ӱмаште очно гына 495 вер лийын.
Южо профессийым вузышто оксала гына тунемын налаш лиеш. Нуно социально-гуманитарный, экономический профиль дене кылдалтше улыт. Тиде Социальный технологий факультетыште «Регионоведение России» у направлений, «Реклама и связи с общественностью», «Конфликтология», «Менеджмент», «Управление персоналом», «Экономике» направлений-влак.
Тений «Педагогический образований» («Математике да экономике») у направленийым почмо. Тушто туныктышо-влакым ямдылаш тӱҥалыт.
«Информационные системы и технологии» направленийым поснак палемдыме шуэш. Кызытсе илышыште кеч-могай отрасль программный обеспечений дене кылдалтын. Мутлан, IT технологий алан, агарный сектор, тӱрлӧ беспилотный машина, ушан теплице да молат. «Информационные системы и технологии» направлений дене вузын кажне факультетыштыже да институтыштыжо бакалавриат уло. Тушто шке профильышт почеш программный обеспечений дене пашам ышташ тунемыт.
Кажне ийын шуко абитуриент технический факультетыш тунемаш пура. Ятыр тунемше информатике ден вычислительный технике факультетым ойыра.
Тунемаш пурымо годым ешартыш 10 баллым конкурслаште, конференцийлаште, олимпиадылаште ойыртемалтше, спортышто кугу кӱкшытыш шушо, «отличий» дене тунем пытарыше-влаклан пуэна, – мане Волгатехысе приёмный комиссийын ответственный секретарьже Антон Аркадьевич Бушмелев.
Приёмный кампанийын пашаже, мыняр абитуриентын тунемаш пурымо шотышто ойлаш але ондак. Кызыт чылан манме гай документым пуэн огытыл. Вес арнян тушто ятыр абитуриентым вучаш тӱҥалыт.
Внутривузовский вступительный испытаний дене тунемаш пурышо-влакын документыштым 18 июль марте налыт. Ты тӱшкашке техникумым, колледжым тунем пытарыше, начар тазалыкан-влак да молат пурат. А ЕГЭ-н результатше дене документым 24 июль марте пуаш лиеш.
Икманаш, вузлаште кызыт паша шуко. Выпускник-влак кажне кечын толын каят, йодыштыт, умылкалат, тыгодым изиш тургыжланат. Вет вузыш тунемаш пурымо дене нунын ончыкылыкышт рашемеш.