25 апрельыште Марий тӱвыра рӱдер Марий самырык театрын сценыштыже «Сӱан толеш! Сӱан толеш!» усталык апшаткудым эртарен. Тудым Марий талешке кечылан да тений Российыште калык-влакын тӱвыра поянлыкыштлан пӧлеклыме.
Тыгай йӱлам Морко район Кӱчыкэҥер тӱвыра пӧрт ончыктыш. Тудын вуйлатышыже Ирина Казакова ава лийше семын шешкыжым сӱаныш чӱчкаш каяш чиктен. Шешкын рольжым Элкэҥер ялын ӱдыржӧ Ирина Кудряшова (Зорина) модын. Тудо ик жап Эҥерсола школышто тӱҥалтыш класслам туныктен, варажым Йошкар-Олашке илаш куснен. Морко-Волжский тӱшкаш пурышо сӱанвате-влак икгайрак вургеман улыт.
Ирина Валериановна, сӱанватым чиктышыла, вургемын, моло сӧрастарыме настан лӱмыштым, кӱлешлыкшым, туддене кылдалтше тӱрлӧ палым да ойӧрӧм ойлен: «Шешкым, шарпаным пеҥгыдын пидман, тушеч ӱппырче койшаш огыл», «Шарпаным пидме деч ончыч тувыр ӱмбак ончылсакышым чийыман».
Сӱанватылан шиян ӱштым ӱшталын, кыдалын кок могырешыже тӱран кужу потам кылден сакалтен, а тупышкыжо тӱрлӧ тӱсан тасма дене келыштарыме аралтышым пижыктен. Эн тӱҥжӧ – оҥым аралыше неле, поян ший аршаш ден оҥйолва.
Вуйышко чиктышаш арвержат икте гына огыл ыле. Сӱанватылан эн ончыч нашмакым пиде, тудын почеш – шарпаным, колйолым да ошпум вуйыш шындыш, вара ӱмбакыже йошкар шовычым пиде. Кидышкыже кок тӱрлӧ тӱсан чевер шовычым пижыктыш. Тыге сӱанвате ямде лие.
Марий тӱвыра рӱдерын сайтше гыч налме фото.