Йошкар-Оласе «Лавель» бренд стилизованный марий вургемым почкалтыш, йытын, кыне куэм гыч урга. Тудын авторжо Александра Журова кажне пашашкыже келге шонымашым пурта.
Чылажат коважын тошто ургымо машинаж гыч тӱҥалын
Йошкар-Олаште шочын-кушшо марий ӱдыр йочаж годымак шкенжын вургем брендым ышташ шонен.
– Эн ончыч эскизым сӱретленам. Вара ковамын тошто ургымо машинаж дене моштыде гыч тӱрлым ургенам. Йоҥылыш-влакым ыштен, эркын-эркын шке гыч ургаш тунемынам. 5-ше класс деч вара чыла усталык шонымашем ӧрдыжеш коденам. Но 20 ияшем годым чонем сӱретлаш, ургаш, икманаш, усталык паша деке угыч шупшын. Кушеч тӱҥалаш, мом ышташ иканаште умылен шуктен омыл. Кок ий гыч шканем костюмын эскизшым сӱретленам да тудын дене ательеш толынам. Мылам урген пуэныт, но паша келшен огыл. Тунам профессионал семын шке ургаш тунемаш шонен пыштенам. Юмо деч вургем брендым ышташ полышым йодынам. Тудо мыйым колын. 25 ияшем годым йолташ ӱдырем кӱлеш оборудованийым мылам пуэн. Мыйым модельер-конструктор Светлана Николаевна Гуськова ургаш туныктен. Пел ий жап тудын дене вашлийын, шукылан тунемын, ургымо пашаште тӱрлӧ нерген каҥашен, брендым ышташ, тичмашын кӱын шуынам. А вара Юмо мый декем икоян шонымашан еҥ-влакым колтен.
Тыге 26 ияшем годым командым погенам. Кызыт тушто шым еҥ. Пашалан посна помещенийым айленам. Кӱлеш арверым утларакшым шке окса дене налынна. Тылеч посна кугыжаныш ургымо оборудованийым налаш соцконтрактым пуэн, – палдарыш Александра.
Лӱмыштат, тамгаштат – келге шонымаш
А.Журован мутшо почеш брендын лӱмжат, логотипшат кӱчык жапыште шочын.
– «Лавель» «Люди Авелевцы» манмым ончыкта. Брендын тамгаж нерген ойлаш гын, тудым йолташем дене коктын 15 минутышто ыштенна. Богородничный шӱдыр покшелне турня ончыкталтеш. Ты кайык – осал дене кучедалшын символжо. Мыйым лишыл йолташем-влак, фамилием кӱчыкемден, Жура манын ойлат. Садлан брендын лӱмжат фамилием: ЖурАвель гыч эше лектын, манаш лиеш. Пашаштына але икымше ошкылым веле ыштенна, но, шонем, ты ошкыл – пеҥгыде, – манеш 26 ияш уста еҥ.
Тукым кыл йомшаш огыл
«Лавель» брендын пашаже ойыртемалтеш. Кызытсе саманлан келшыше улыт, но тыгодым ожнысо шӱлышым шижаш лиеш. Тидыже натуральный куэмым кучылтмылан кӧра докан. Александра каласкала:
– Кӱлеш чыла материалым палыме поставщик-влак деч веле налам. Икмыняр йытын куэмым туныктышем пуэн. Почкалтыш, йытын да кыне куэмла гыч веле вургемым ургена. Мемнан шонымаште, тыгай тувыр веле айдеме капым да чоным арала, эмлаш полша. Ончыкыжым СССР жапысе куэм-влакым кычалаш шонем.
Пашаштына марий тамгам кучылтына. Тидым мый модылан кӧра огыл, а чон йодмо почеш ыштем. Мый марий ӱдыр улам. Шнуй пале, шинчымаш нерген ятыр ий шымлем да эре ум кычалам. Чыла тиде мыйым марий тӱвыраш да йӱлаш конден. Лач тунам шкемын марий улмемым да виян калык улмынам умыленам. Марий кумалтышыш кошташ тӱҥалынам. Мутлан, Акпатыр он, Чумбылат кумалтышыште лийынам. Олаште шочшо марий ӱдыр улам, а калыкем нерген моткоч чӱдын палем. Книга кевытлаште марий-влак нерген материалым кычалынам, но шагал муынам. Вара книгагудылаште марий-влакын культурышт нерген статья-влакым лудынам да умыленам, мый ӧрдыжеш кодын ом керт: лудмо шинчымашем, илышыш пуртынем, пайдам кондынем. Самырык улам, сандене самырык тукымым марий темылан утларак кумылаҥден кертам, шонем.
Илыш вашталтеш, ончычсо семын ынде огеш лий. Айдемын вӱрыштыжӧ шочмо генже, шарнымашыже помыжалтеш. Вашке уло тӱня шке культуржо деке савырна. Марий калыкат шке йӱлажым аралышаш. Сандене «Лавель» брендын тӱҥ шонымашыже – ик тургымлан модо огыл, а илыш, могайым ме тудым ужына. Вургемым айдемын чонжым да тазалыкшым аралаш полшымо шонымаш дене ургена. Тиде стиль веле огыл, тиде – аралтыш. Мемнан кугезе тукымна лач тыге ыштен. Марий тӱрым командынан чолга еҥже Ирина Михалёва ышта. Тылеч посна тӱрлӧ тӱрлан келыштаралтше тӱрлымӧ машинкына-влак улыт. Ончыкыжым шке кид дене тӱрлаш тунемына, тидыже марий тӱрын ямжым тичмашын почын ончыкташ полша.
Ончыко!
Александра кеч-могай тувырым эн ончыч шкаланже урга да тудым огеш ужале, но йодмо почеш тыгайымак вес еҥланат урген кертеш.
– Стильым шижаш мылам пӱртӱс пуэн, тудо ава, можыч, кугезе тукымем деч куснен. Ушыш толшо шонымашем илышыш вигак пурташ тыршем. Коллекцийым ямдылымаште утларакшым шинчымашем кучылтам. «Лавель» брендын икымше показше «Камелот» рестораныште лийын. Моло показ-влакым «Мода» школ эртарен. Пытартыш гана показна декабрьыште Сейвори Хаус залыште эртен. Ме вургемым веле огыл ургена. Маша кидмастарна сӧрастарыме ӱзгар-влакым, марий тамган брелок-шамычым ышта. Конешне, могай тудо лийшашым ме пырля шонена. Пытартыш показыштына шукылан «Подкогыльо» брошь келшен, – каласыш А.Журова.
Декабрьыште коллекцийым ончыктымо деч вара «Лавель» бренд нерген интернетлаште ятыр публикаций лийын. Моктымо мут деч посна критикат йоҥген. Но Александра тидлан ок сыре. «Мый грамотный критикым веле шотыш налам. Удам возымым вигак мондем. Иктажым ойлымо деч ончыч брендын концепцийжым умылыман», – манеш тудо. Лишыл жапыште «Лавель» эше ик показым ончыкта. Кушто да кунам эртымыжым, коллекцийын ойыртемже нерген але ок ойло. Жапыштыже чыла ужына тугеже.
А.Журован колтымо фотожо-влак.