Кужэҥер районысо Токтайбеляк селам шукынжо ятыр гана эртен кудалынна. Тудым марлаже Топкавлак манме нерген колын огынал. А тусо илыш нерген палена мо? 19 мартыште тушко «Кугарня» газет редакцийын пашаеҥже-влак унала мийышна. Школышто тунемше да туныктышо-влак дене вашлийна, марий калык модыш-влак да волейбол дене модна, селасе еҥ-шамычын могай сомылым ворандарымышт нерген умылкалышна.
Чолга еҥ-влак улыт
Токтайбелякыште илыше да ятыр жап пионервожатыйлан пашам ыштыше, Пашан ветеранже Юлия Геннадьевна Светлакова дене уремыште вашлийна. Тудо библиотекыш ошкылеш ыле. Краевед семын Токтайбеляк кундемым шымла. Тиде чолга еҥ кодшо ийын обелискым тӧрлаташ еҥ-влакым тарватен. Йӱр деч авыртышым профнастил дене ыштыме, пырдыжым, печым уэмдыме, пушеҥгым руымо, клумбым келыштарыме. Пырдыжыш ветеран-влакын лӱмыштым возен пытараш гына кодын.
Тиде пашам шукташ Тумньо ялеш шочын-кушшо самырык амалкалче Анатолий Иванович Яндыганов полшен. Тудак тылеч ончыч шӱк контейнер-влакым ыштен пуэн. Тыгак чоҥымо пашам шукташ тӱрлӧ верыш кудалыштше Анатолий Васильевич Яндыганов кажне ийын йоча-влаклан школ воктене ий курыкым «шочыкта».
Кодшо ийынак Токтайбелякыште у сынан йоча площадкым ыштыме. Тудым келыштараш Кугыжаныш Погынын депутатше, «Марикоммунэнерго» ООО-н гендиректоржо Сергей Валерьевич Белоусов полшен.
Тӱрыс статьям «КУГАРНЯ» газетын 26 мартысе номерыштыже лудаш темлена.