6 мартыште Марий Элым Вуйлатыше Ю.Зайцев Звенигово районышто икмыняр социальный объектыште да предприятийыште лийын.
Эмлымверыште
Звенигово районысо рӱдӧ эмлымверын поликлиникыжымончен савырнен. Зданийысе пырдыжым, окнам, омсам, инженерный коммуникацийым вашталтыме, у мебельым налме. Тудым «Модернизация первичного звена здравоохранения» региональный проект почеш капитально олмыктымо.
Поликлинике ик сменыште 500 еҥлан услугым пуаш йӧнештаралтын. Тыште 12,8 тӱжем еҥ медполышым налеш. 16 специальностян 21 врач тырша.
Тыгак Ю.Зайцев Красногорскысо тӱвыра да каныме рӱдерым ончен савырнен. Тудым олмыкташ Марий Эл Правительствын резервше гыч 20 млн наре теҥге ойыралтын.
Рӱдерыште, заводышто
Ю.Зайцев Сварочный технологий рӱдерыште лийын, вуйлатыше дене план ден сеҥымашла нерген кутырен. Тыгодым тудо «Кадры» у нацпроект нерген ойлен да кызытсе экономикылан специалист-влакым ямдылыме годым тунемше-влакын профориентацийыштлан тӱткышым ойырыман манын.
«Марийские 3D Технологии» ООО-н гендиректоржо А.Алимовын мутшо почеш, сварщик профессий кызыт йодмашан да кугу пашадар тӱлалтеш.
Ты рӱдерым партнёр ESAB компаний дене пырля 2020 ийыште шочын. Тушто тулымо да пӱчмӧ пашам шуктат, оборудованийым, материал-влакым ыштен луктыт.
Кызыт рӱдер производствылан кӱкшӧ квалификациян специалист-шамычымат ямдыла.
Звениговысо строительный гипс заводышто чоҥымо материалым ыштен луктыт. Завод идалыкыште 84 тӱжем кукшо строительный вартышым да 82 тӱжем тонн гипсым ямдыла. Предприятийын инвестицийже 360 млн теҥгешке шуын.
Туштат Ю.Зайцев лийын. Тудо йотэлысе компаний-влакын кораҥмыштлан кӧра шке сатум шукырак ыштен лукмташ да ты рынокышто ончылно лияш кӱлеш манын каласен.
Марий Элым Вуйлатыше Звенигово районыш миен коштмыж деч вара совещанийым эртарен. Тушто тошто пӧртлам пужымо, тӱвыра объектлам чоҥымо да ЖКХ йодышлам каҥашыме.
Эльвира Терентьева.