Пытартыш жапыште соцкыл полшымо дене Йошкар-Олаште вуйлатыше-влаклан тӱрлӧ чаракым ыштылаш тӧчымаш шижалтеш. Теве нимо уке гычак Йошкар-Оласе Сомбатхей тураште Пӱнчер/ (Сосновая роща) кумдык шотышто ӱчашымаш тарванен.
Кушеч чыла тӱҥалын? Пуйто тыште пушеҥгым руэн налыт да пӧрт-влакым чоҥаш тӱҥалыт манме уверым шаркалыме деч вара Пӱнчер кумдыкышто чумырыгышо калык дене вашлиймашке Йошкар-Олан мэрже Евгений Маслов миен да чылажымат раш умылтарен. Тиде шотышто видеообращеният возалтын. Но еҥ-влак (уло калык манаш нигузе ок лий, Йошкар-Олаште илыше-влак шукынжо мо шотышто «лӱшкымаш» кайымым огытат пале) тидын дене келшен огытыл, умбакыже шояк уверым шаркаленыт. Пуйто вуйлатыше-влак калыкым лыпландараш тӧчат, а шкешт «шолып план» дене пашам шуктат.
Чынже кушто? Тул деч посна шикш ок лек манына гын, тугеже шоялан шарлаш амал тыштат лийын.
Можыч, чылажат Йошкар-Ола покшеч йоген эртыше эҥерым эрыктыме дене кылдалтын? Марий Элын пӱртӱс поянлык, экологий да йырым-йырысе кумдыкым аралыме министрын алмаштышыже Сергей Поповын палдарымыж почеш, 2023 ийыште Ширяйково микрорайон тураште Изи Какшаным эрыкташ тӱҥалме. Пашалан (кугыжаныш экспертизе гоч эртен) 48 млн теҥге ойыралтеш. Чылаже 3,5 гектар кумдыкым эрыкташ, 50 тӱжем кубометр йошкыным лукташ палемдыме. Тудым Какшан серышкак шарен шындат. Лӱдшаш уке, вӱд йымалсе мланде аяран огыл. Палдарена: Изи Какшан 2007 ий гычак эрыкталтеш. Пашам 2030 ийлан мучашлаш палемдыме.
Тидымат палемдат: Пӱнчер – кугыжанышын поснак оролымо пӱртӱс кумдыкшылан шотлалтеш. Тугеже тыште чоҥымо пашам шонымо семын тӱҥалаш неле, огешат лий.
А лӱшкымаш кеч-кунамат тарванен кертеш. Шарнеда вет, Сомбатхей гыч Ширяйковыш лукшо корным, Изи Какшан гоч у кӱварым чоҥымо деч ончычат еҥ-влак кузе торешланышт. Ончыкыжым ты корным умбакыже шуйышаш улыт. Тунамат «тидын дене келшыдыме-влак лектыт» чай. А илышыже вашталтеш, ола кумдаҥеш, у корно деч посна ок лий.
Но мо поснак шонаш тарата. Калык пуйто вуйлатыше-влакым кепшылыште кучаш тырша. Йошкар-Олаште ончалаш гын, тений июльышто Фестивальный микрорайонышто, августышто Ремзавод кумдыкышто погынен, ола администрацийын чоҥымо паша планже дене келшыдымым ончыктеныт.
Мэр чыте веле…
