Вуйлатыше районлашке коштын

Фотом www.marpravda.ru сайт гыч налме.

Марий Эл Республикым вуйлатыше А.Евстифеев Килемар, Марий Турек да Параньга районлаште лийын, администрацийлам вуйлатыше-влак дене вашлийын.

Килемар районышто «йыргешке ӱстелым» эртарен, «Раздолье» каныме базыште «Акпатыр» оперым ончен. Тыгак Вӹзӹмйӓр школым ончалын (фотошто). Тудым тений кеҥежым капитально олмыктымо. Тидлан 25,5 млн теҥгем ойырымо. Ты окса денак класслашке у мебельым налме, лишыл жапыште тудым кондышаш улыт. Кызыт тыште 200 йоча тунемеш.

Марий Турек район администрацийым вуйлатыше С.Решетовын ойлымыж почеш, телы-
лан ямдылалтме шотышто нелылык уке. Шокшо да кукшо игечылан кӧра Эҥербал ялыште да Хлебниково селаште калыклан вӱдым ситарыме шотышто нелылык лектын. Тидлан эше ик скважиным кӱнчыман да вӱдпучым вашталтыман. Тыгак Эҥербал йочасад дек корно уда. Нине экшык-влакым А.Евстифеев лишыл жапыште кораҥдаш палемден.

Параньга район администрацийым вуйлатыше А.Ибраев каласен: районышто ныл ялыш газпучым шупшаш кодын. Вес ийын тидын шотышто проект пашам тӱҥалыт. Ныл ийыште районышто 97 пӧртым чоҥымо. Самырык еш да ача-ава ончымо деч посна кодшо ӱдыр-рвезе-влаклан илыме верым пуаш сертификатым кучыктымо.
Ялозанлыкыште тений икымше пелийлан 3,9 млрд теҥгеаш продукцийым ыштен лукмо. Райрӱдыштӧ тунемме учрежденийлам олмыктымо паша умбакыже шуйна. Вес ийлан Матародо, Мераҥсола да Пӧртанур ялласе школлам олмыкташ документацийым ямдылат. Элнет селасе черкым уэмдаш тӱҥалыныт. Корным олмыктымо пашат сайын шукталтеш.