Пошкырт кундемыште «Башкортостанысе ӱдырамаш-влакын обществышт» региональный мер организаций кажне ийын «Ӱдырамаш – нацийын аваже» конкурсым эртара. Тений тудо кудымшо гана лийын.
Тушко ты республикын тӱрлӧ районжо гыч шке кундемыштышт ойыртемалтше еҥ-влак ушнат. Благовещенск олаште илыше марий ӱдырамаш, верысе «Оҥгырйӱк» фольклор калык ансамбльым чумырышо да тудын вуйлатышыже, «Эрвел Марий» калыкле тӱвыра автономий вуйлатышын алмаштышыже Ирина Аптыкаева «Ӱдырамаш – ава» номинацийыште сеҥен.
Тудо образованийже дене педагог, а кызыт «Орифлейм» компанийын директоржо.
Ирина шкеже Нуриман район гыч. Пелашыж дене коктын ныл эргым ончен-куштат. Нунылан чыла шотыштат пример улыт. Спортым йӧратат, марий йӱлам шуктат, ансамбльыш коштыт.
Ирина Валентиновна ден пелашыже икте-весым умылен, полшен, йӧратен илат. Владислав Ильич жапше годым Афганистаныште шокшо точкышто служитлен, кызыт ты олаште пожарныйлан пашам ышта.
Чолга марий ӱдырамашым меат уло кумылын саламлена.
Ирина Ябердина.