«Майатул» фестивальыште Удмуртий Республикысе национальный театр «Начало года» («Арлэн Кутсконэз») спектакльым ончыктен.
Тидын деч ончыч Шкетан лӱмеш Марий драмтеатрын художественный вуйлатышыже В.А.Пектеев Удмуртий Республикысе театрым вуйлатыше С.А.Чирковлан грамотым пуэн. Тудын мутшо почеш, икымше тыгай фестивальым Ижевскыште эртарыме, но тунам тудо вес семын маналтын.
Ты спектакльыште районысо эмлымверыште тыршыше врач, медпашаеҥ-влак нерген каласкалалтеш. Кажне кечын нуно куштылго огыл пашаштым кӱлынак шуктат: еҥ-шамычым эмлат, илышыштым арален кодат. «Хирургын йоҥылышым ышташ праваже уке» манме шонымашыш шуыт.
Профессионал порысым шуктышыла, герой-влак икте-весыштым йӧратен шындат, ӱчашат, туманлат, икте-весе деч кораҥыт, сайлан ӱшанат. Спектакльын тӱҥ историйыштыже кок врачым ончыктымо: тиде – районысо тӱҥ врач, илалше хирург-гуманист Алексей Петрович Соснов да самырык хирург-карьерист, эгоцентрист Георгий Световидов.
Ончаш толшо-влак шагалын огытыл ыле. Тӱрлӧ ийготан еҥ-влакым ужаш лие. Вара жюри ты пашалан акым пуэн, уто-ситым ойлен. Спектакльыште икте-весе дене келшен толдымо шуко темым нӧлталме, актёр-влак ятырын улыт, тичмашнек почын пуымо огыл, манын палемдышт. Тудым шындыше еҥлан драматургий дене сайын пашам ышташ темлыме.