Кундемыштына «Продолжительная и активная жизнь» нацпроектын «Медицине кадр-влак» федеральный программыже илышыш шыҥдаралтеш. Тудын дене келшышын, 2025 ийыште 29 врач да кыдалаш звенон 9 специалистше дене договорым ышташ палемдыме.
«Земский фельдшер» программе почеш икымше договорым Кужэҥер районысо Шорсола фельдшерско-акушерский пунктын вуйлатышыже дене подписатлыме. Ты кундемыште 2018 ий годсек медпашаеҥ лийын огыл. Райрӱдысӧ эмлымверын специалист-шамычлан арнялан ик гана кудалышташ логалын. Ынде ты кундемысе 700 наре еҥлан кӱлеш жапыште медицине полышым пуат.
2024 ийыште Марий Элыште «Тазалыкаралтыш» нацпроектын кундемнан медицине тӧнежлажым квалифицированный специалист-влак дене пойдарыме программыж почеш 25 договорым пеҥгыдемдыме: 15 врач-шамыч дене, кыдалаш звенош пурышо 10 медпашаеҥ дене. Селалашке 5 врач да кыдалаш звенош пурышо 10 медпашаеҥ, ола шотан посёлкыш 7 специалист, 50 тӱжем деч шагалрак илыше еҥан олалашке 3 доктор пашам ышташ каен.
2026 ийыште 38 медпашаеҥ дене договорым ышташ палемдыме. Тушеч 7 врачым да кыдалаш звенон 9 медпашаеҥжым селалашке, ола шотан посёлкылашке 14 специалистым, 50 тӱжем деч шагалрак еҥан олалашке 8 докторым колтышаш улыт. Специалист-влак Медведево, Звенигово, Советский, Шернур, Марий Турек, Параньга районласе рӱдӧ эмлымверлаште, Козьмодемьянскысе, Килемар районысо эмлымверлаште, республикысе психиатрический эмлымверыште пашам ышташ тӱҥалыт.
2012 ий годсек «Земский доктор» программе почеш кундемыштына чылаже 278 медпашаеҥ дене договорым ыштыме. 228 врач да кыдалаш звенон 50 пашаеҥже ялла ден селалаште пашам ышташ тӱҥалыныт.