У Торъял район Токтарсола ялын ӱдыржӧ Анна Якимова врач лияш шона. Тиде тудын изиж годсо шонымашыже.
Кызыт ӱдыр МарГУ-што тунемеш, кокымшо курсыш вончен. Ныл классым А.Якимова шочмо ялыштыже тунемын, вара Тошто Торъял селасе школыш куснен.
– Изиэм годым тӱрлӧ профессийым ойырен налаш шоненам: туныктышо, мурызо, врач… Но пытартышыже нерген чӱчкыдынрак шонкаленам. Шарнем, модышем-влакым радам дене шындем да нуным эмлем ыле: пуйто уколым ыштем, тӱрлӧ эмым йӱктем. Теве кушкын шуамат, тале специалист лиям, еҥ-влакым эмлаш тӱҥалам, шоненам. Садлан школышто биологий ден химий предмет-влакым эн чот йӧратенам, эше математике келшен. Мый тыгак йылме-влакым тунемаш йӧратенам. Руш йылме дене туныктышем Эльвира Ивановна Киткаева сочиненийым сылнын возаш туныктен. Почеламут-влакым серенам. Руш йылме дене олимпиадылаштат участвоватленам да ончыл верыш лектынам. «Ямде лий» газетыш почеламутым, очеркым, сочиненийым чӱчкыдын возенам. Марий йылмылан туныктышем Лидия Анатольевна Янгабышева шӱмаҥден. Почеламутым лудмо конкурслаште ятыр гана сеҥышыш лектынам,– каласкала Анна.
Ӱдыр школышто эртаралтше мероприятийлаш кумылын ушнен. Тудлан ятыр пайремыште вӱдышӧ лияш ӱшаненыт, сценыште мурен, спектакльлаште модын. Классыштыжат туныктышыжлан полышкален. Класс вуйлатыше М.А.Скуратова тунемшыже-влакым чолга лияш туныктен.
11-ше классым тунем пытарымеке, Анна МарГУ-со медицине факультетыш тунемаш пураш шонен. Тидлан кӱлынак ямдылалтын, репетитор деке коштын. Кызыт ынде икымше курсым тунем лектын, специализацийже – врач-терапевт.
– Калыклан полшынем, садлан тиде профессийым ойырен налынам. Адакшым кызыт могай гына чер уке, садлан ончыкылык профессиемын кӱлешлыкше пеш кугу, – манеш А.Якимова. – Тунемаш келша. Дисциплине-влак куштылго огытыл, но мый тыршем. Анатомий ден гистологийым эн чот йӧратем. Телым икымше практикына лийын. Тудо коронавирус черлан кӧра эмлымверыште огыл, университетын симуляционный манме рӱдерыштыже эртаралтын. Уколым да перевязкым ышташ, вӱрым налаш, кабинетым чын дезинфицироватлаш, черле еҥым ончаш тунемынна. Мыланем гын ниможат нелын чучын огыл. Дипломым налмеш, эше шуко жап уло гынат, ончыкыжым ординатурыш тунемаш пураш да узкий манме специальностьым ойырен налаш шонем.
Анна – поро кумылан ӱдыр, янлыкым йӧрата. Тудо моторын сӱретла, сылнын мура. Ончыкыжымат тыгак тыршен тунемаш шона, пытартыш курслаште яра жапыште эмлымверыште пашам ыштынеже.