Сотнур школын коллективше отличнице Оля Николаева дене кугешна. Тудо ЕГЭ-м сайын куча гын, шӧртньӧ медаль дене школым пытарен кертеш. Тунемме деч посна ӱдыр спорт таҥасымаште, муро конкурслаште шкенжым ончыкта. Шкеж дене Оля палдара:
«Лӱйкалымаш, куштылго атлетике дене районысо первенствылаште икмыняр гана сеҥышыш лектынам. Строй дене кошташ йӧратем. Такшым военный тематике чонемлан лишыл. Тений ОБЖ дене республикысе олимпиадыште призовой верым налынам. Ты предметым туныктышо Олег Васильевич мыйым олимпиадылан чот ямдылен. Тылеч посна руш ден марий йылме-влак дене районысо олимпиадыште призовой верыш летынам ыле. 9-ше классыште врач лияш шонымаш лийын, но тудым вашталтенам. Кызыт Санкт-Петербургысо ик военный академийыш тунемаш пураш ямдылалтам. Сценыште выступатлаш, поснак мураш, йӧратем. 19 майыште Памарыште «Шоу талантов» англичан мурым мурымо конкурс лиеш. Тушто выступатлем».