Ты урем оласе историйын рӱдыштыжӧ верланен – Лев Толстой урем гыч Ленин проспект марте шуйна.
Уремым тыште улшо черкын лӱмжӧ дене лӱмдымӧ. Черкым 1756 ийыште чоҥымо.
Совет власть толмеке, 1919 ий 16 январьыште Царевококшайск уездысе Кресаньык, пашазе да Йошкар Армийын депутатше-влак советын исполкомжо Карл Марксыш вашталташ пунчалын.
ХХ курымышто Карл Маркс Кокшайск проезд марте шуйналтын. У курым уремын лӱмжым пӧртылтен. 2008 ийыште Толстой гыч Ленин проспект марте ужашыже угыч Вознесенский лийын. Тыште лесопромышленник Т.В.Чулковын пӧртшӧ (тиде Йошкар-Оласе историй тоштер), купеч Кореповмытын пӧртышт (кызыт яра шога), купеч И.Пчелинын пӧртшӧ (тудо Марий да Йошкар-Оласе Руш православий черкын полатше) улыт.
Э.Терентьеван фотожо-влак.