Воштылтыштак!

14 мартыште И.С.Палантай лӱмеш тÿвыра да сымыктыш колледж пеленысе национальный гимназийын 9 «Б» театральный классыштыже тунемше-влак «Воштылаш гын, воштылаш» музыкально-литературный композицийым модын ончыктышт.

Пайрем мероприятийым марий кадриль дене почыч. Тылеч вара ончыкылык артист-влак В.Регеж-Гороховын, М.Шкетанын, В.Колумбын, Н.Мухинын мыскарашт негызеш чоҥымо композиций-влакым мастарын лудыч. Ӱдыр-рвезе-влакын изишак тургыжланымышт шижалте гынат, артист койышышт дене чылаштым савыральыч.

Ты постановко-влакым сценыште ончыкташ туныктышышт Л.Г.Казанцева кумылаҥден. Тидын нерген тудо тыгерак мане:

Ик кечын тунемше-влак дене погынен, у программым ямдылыме шотышто каҥашышна. Мый нунылан классик але кызытсе автор-влакын произведенийыштлан эҥерташ темлышым. Ӱдыр-рвезе-влак дене ик ойыш шуын, марий классик-влакын мыскара сынан ойлымашыштым, почеламутыштым лудаш кутырен келшышна.

Ме тидлан кыртмен ямдылалтынна. Вет тунемше-влакат тӱрлӧ улыт. Иктылан ямдылалташ жап шукырак кӱлеш гын, весе икмыняр кечыште программым тунем шукта, темыжат иктылан лишыл гын, весылан нелыракын пуалтеш. Кажныж дене кугу паша шукталтын. Нуно вет але тунемыт веле, садлан нелылык денат утларак вашлиялтыт. Тӱҥжӧ кумылышт уло, тидыже куандара.

В.Регеж-Гороховын «Аэробика – таза шӱм-чон» мыскаражым Талвий Абрамов лудо.

Произведенийым тунемме годым уто нелылыкым шижын омыл. Ме ятыр почеламутым чӱчкыдын тунемына. Куштымаште да актёр мастарлыкым почын пуымаштат мемнан дене специалист-влак пашам ыштат. Мыланем утларакше комедийыште, мыскара жанрыште модаш келша. Шкежат весела кумылан, шыргыжаш йӧратыше рвезе улам. Мыскара-влакым ыштылаш йӧратем. Садлан тачысе номерым чон почынак ончыкташ тыршышым, – палдарыш Талвий.

«Ончаш толшо еҥын чонжым савыраш, образым сайын почын пуаш иктаж-могай секретет уло?» – йодым рвезе деч. «Шыргыжаш, весела койышым пӧлеклаш», – мане тудо.