25 октябрьыште Йошкар-Оласе Самырык-влакын полатыштышт марий КВН регион-влак кокласе фестиваль эртаралтын.
Тений Кугу Отечественный сарыште сеҥымылан 80 ий теммым, Марий Эл Республиклан 105 ий теммым, Элым аралышын идалыкшым шотыш налын, фестивальлан тыгай темым ойырен налыныт: «Пол… Па… Ак… Ир… Чу… Ма… Марий патыр улына».
Ныл команде: «10-ка» (Йошкар-Ола), «Шернур патыр» (Шернур район), «Ӧлӧҥгӧ» (Морко район), «У вий» (Башкортостан Республик, Мишкан район) – мыскара конкурсышто икымше верым налшаш верч таҥасен.
Эн ончыч «Визитке» этапыште команде-влак шкешт нерген палдареныт. Мутлан, «У вий» командым Мишкан район Ирсай школын туныктышыжо-влак чумыреныт, садлан нуно уроклаште лийше тӱрлӧ оҥай случайым модын ончыктеныт. Вара «Разминкыште» ныл командыге сценыш лектын да кажне командын ямдылыме кок оҥай йодышлан мыскара сынан вашмутым кычалын.
Тыге жюрин еҥже Васли Ольошын (Пошкырт кундем Мишкан районышто Республикысе Марий эртык тӱвыра рӱдер филиалын тӱҥ специалистше, мурызо А.В.Ибулаев) кӱсеныштыже мо кия, марий мифологийыште молан лач 12 патырым палемдыме, марий патыр-влак могай лийыныт да моло йодышлан вашмутым участник-влак деч пален налынна. Жюриште тыгак Марий Элын сулло артистше, Марий тӱвыра рӱдерын директоржо А.В.Бирюков, «Марий книга савыктыш» савыктыш пӧртын директоржо Э.А.Иманаев, Шернур районышто тӱвыра пӧлкам вуйлатыше И.Л.Казанцева, писатель, мыскараче-автор, Звенигово район Нуктуж тӱвыра пӧртым вуйлатыше Е.А.Юнусова лийыныт.
Команде-влак «Мӧҥгысӧ пашалан» «Йомак умбак – мый тембак» теме почеш выступленийым ямдыленыт. Теве «10-ка» командын участникше-шамычын Пампалчылан качым кычалмыштым воштыл ончышна. Шернур районын командыже Нӧнчык патыр нерген сценкым модын ончыктеныт. Патыр-влак пӧръеҥ коклаште веле огыл, ӱдырамаш коклаштат улыт – теве мом пален нална «Ӧлӧҥгӧ» командын оҥай выступленийже гыч. «У вий» командын чевер ӱдыржӧ-шамыч «Кум патыр» лӱман йомакым ямдыленыт.
– Ныл команде – тиде пеш лач. Шукырак лийыт гын, конкурс-влакым шагалемдаш логалеш ыле. А тыге жап шотышто йӧнан – ончаш толшо еҥ ноен ок шукто, – ойла фестивальым ямдылыше С.Карпов.
Чынжымак, кок шагат утларак жап ончышылан – ны шуко, ны шагал огыл. Адакшым кажне этап деч вара жюри иканаште баллым шынден, тидат сеҥыше-влакым жапым шуйкалыде ойыраш полшен.
– Шижалтеш, южо командылан репетиций ситен огыл. Садлан вес гана чотрак ямдылалтман, мыскара шотыштат шоналтыман. Но пӱсӧ мыскаражат шуко ыле. Мо куандара: уда койыш, «кыдал деч ӱлыкыла» темылан нимогай мыскара лийын огыл – чыла шот дене ямдылыме, – палемден А.Бирюков.
Номинаций-влак:
- «Эн пӱсӧ мыскара» номинацийыште «10-ка» командын капитанже Игорь Попов ойыртемалтын. Тиде командак «Интернет-йӱклымаш» номинацийыште эн шуко йӱкым поген.
- «Мыскараче ӱдырамаш» – «Ӧлӧҥгӧ» командын капитанже Алевтина Токташева.
- «Мыскараче пӧръеҥ» лӱмым Денис Мамаевлан («Шернур патыр» команде) пуымо. «Шернур патыр» команде «Муро кумылан команде» семын палемдалтын.
Марий КВН фестивальыште эн шуко баллым Морко тӱвыра полатын «Ӧлӧҥгӧ» командыже поген да икымше верыш лектын. Кокымшо верыште – Пошкырт кундем Мишкан район гыч «У вий» команде. «10-ка» команде – кумшо верыште.
– Патыр-влак дене кылдалтше теме почеш мыскарам шонаш куштылгыжак огыл ыле – сценарийым возашак ятыр жап каен. Варажым сценыште репетицийым эртарыме годым иктым ешарет, весым тӧрлет. Тыршымына арам лийын огыл – икымше верым налынна. Тиде ончыкыжымат мыскара конкурслаш ушнаш кумылаҥда, – ойла «Ӧлӧҥгӧ» командын капитанже Алевтина Токташева.
Элина Ямбаршева, ончаш толшо:
– Марий КВН-ым икымше гана онченам. Кажне команде шке мастарлыкшым сайынак ончыктен моштен. Морко район гыч «Ӧлӧҥгӧ» команде эн чот келшен. Нуно оҥай мыскара да сценыште койын моштымышт дене калыкын кумылжын налыныт. Ӱшанем, марий КВН умбакыжат вияҥаш тӱҥалеш.
Фестиваль кышкарыште Марий тӱвыра рӱдер пелен «Весела кӱдыр» марий КВН клубым почмо. Команде-влакын капитанышт дене ончыкыжым ыштышаш паша нерген мутланеныт. Мутлан, идалыклан кок гана Марий Элысе районлашке да вес кундемышкат лектын, мыскара модмашым эртараш кутырен келшеныт. Воштылмаш ӱмырым шуя гын, тиде – пеш кӱлешан паша. Адакшым тыгай мероприятий-влак марий йылмым арален кодымаште кугу шӱкалтышым ыштат.
В.Поликарповын фотожо-влак.